ތަހުގީގު ކުރުމުގެ ހާއްސަ އުކުޅު ބޭނުންކުރުމުގެ ގަވާއިދު، ގާނޫނު އަސާސީން ލިބިދޭ އެހެނިހެން ހައްގުތަކާއި ތައާރުޒުވާކަމަށް ވިދާޅުވެ މާވަށު ދާއިރާގެ މެމްބަރު މުހައްމަދު ސައީދު ހުށަހެޅުއްވި މައްސަލަ ބަލައި ނުގަނެ ރައްޔިތުންގެ މަޖިލީހުން ބޭރުކޮށްލައިފި އެވެ.
ސައީދު ހުށަހެޅީ މައްސަލަ ބަލައިގަތުމާއި ގުޅޭގޮތުން މަޖިލީހުގެ ތަޅުމުގައި ނެގި ވޯޓުގައި އެ މައްސަލަ ބަލައިގަންނަން ފެންނަކަމަށް ވޯޓު ދެއްވީ އެންމެ 7 މެމްބަރުންނެވެ. ނުފެންނަކަމަށް 22 މެމްބަރުން ވޯޓު ދެއްވި އެވެ.
މިއަދުގެ ޖަލްސާގައި މައްސަލަ ހުށަހަޅުއްވަމުން ސައީދު ވިދާޅުވީ ފުލުހުންގެ ގާނޫނުގެ ދަށުން އަލަށް އެކުލަވައިލި ތަހުގީގު ކުރުމުގެ ހާއްސަ އުކުޅު ބޭނުންކުރުމުގެ ގަވާއިދުގެ ސަބަބުން ރައްޔިތުންގެ މިނިވަންކަމަށް ހުރަސްއެޅިގެން ދާކަމަށެވެ. އެގޮތުން ޒާތީ މިނިވަންކަން ނިގުޅައިގަނެވި، މީހުންގެ އަމިއްލަ ގޭގޭގައި ސިއްރުން ކެމެރާއާއި އެހެނިގެންވެސް އިލެކްޓްރޯނިކް ޑިވައިސް ހަރުކުރުމުގެ ހުއްދަ ދެވޭތީ އެކަމާއި ސައީދު ކަންބޮޑުވުން ފާޅުކުރެއްވި އެވެ.
އަދި ވިދާޅުވީ ޖާސޫސުކޮށް ފަރުދުންގެ ޒާތީ މައުލޫމާތު ހޯދުމުގެ ބާރު ފުލުހުންނަށް ލިބިދޭތީ އެއީ ރައްޔިތުންގެ ދިރިއުޅުމުގެ ހައްގަށް އަރައިގަތުންކަމުގައި ދެކިލައްވާ ކަމަށެވެ.
މަޖިލީހަށް ބަލައިނުގަނެ ބޭރުކޮށްލި މައްސަލައިގައި ސައީދު އެދިފައިވަނީ ފުލުހުންގެ ހާއްސަ ގަވާއިދު މުރާޖައާ ކުރުމަށެވެ.
