އިސްލާމް ދީން ނޫން އެހެން ދީންތަކަށް ރާއްޖޭގައި ފުރުސަތު ދޭން ޖެހޭކަމަށް ބުނެ ރައްޔިތުންގެ މަޖިލީހުގައި އެކަމަށް ގޮވައިލެވުނީ ޖަޒުބާތުގައި ޖެހިގެން ކަމަށާއި އެކަމަށް މައާފަށް އެދޭކަމަށް ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެ އެވެ.
އިއްޔެ ޖާބިރު ވަނީ މަޖިލިސް ތަޅުމުގައި ބަހުސް ކުރައްވަމުން އެހެން ދީންތަކުގެ މީހުން ރާއްޖެ އައިސް ނަމާދުކޮށް އުޅެވޭނެ ގޮތް ހަދަންޖެހޭ ކަމަށް ވިދާޅުވެފަ އެވެ. އަދި ރާއްޖޭގައި އެހެން ދީންތަކަށް މިނިވަންކަން ދޭން ޖެހޭކަމަށް ޖާބިރު ވިދާޅުވި އެވެ.
ޖާބިރުގެ ވާހަކަތަކާއި ގުޅިގެން އާންމުންގެ ބޮޑެތި ފާޑުކިޔުންތަކެއް އަމާޒުވެފައިވަނިކޮށް އިސްލާމިކް މިނިސްޓްރީންވެސް ވަނީ އެ ވާހަކަތައް ކުށްވެރިކޮށްފަ އެވެ. މަޖިލީހުން ވަނީ ޖާބިރުގެ މައްސަލަ ބަލަން ފަށައިފަ އެވެ.
މިކަމާއި ގުޅިގެން ޖާބިރު މިއަދު ވިދާޅުވީ ޖަޒުބާތުގައި ޖެހިގެން ދެއްކުނު އެ ވާހަކަތަކަށް ރައްޔިތުންގެ ކިބައިން މައާފަށް އެދޭކަމަށެވެ. ޖާބިރު ވިދާޅުވީ އިސްލާމް ދީނަށް އުނިކަން އަތުވެދާނެފަދަ ވާހަކައެއް ދެކެވުމުން އެކަމާ ހިތާމަކޮށް ތައުބާ ވެއްޖައިން ކަމަށާއި އެފަދަ ވާހަކައެއް ތަކުރާރު ނުކުރައްވާނެ ކަމަށެވެ.
ރައްޔިތުންގެ މަޖިލީހުގެ މެމްބަރުން މަޖިލިސް ތަޅުމުގައި ދައްކާ ވާހަކަތަކަށް ހާއްސަ އިމްތިޔާޒުތަކެއް ހުންނަނީ ގާނޫނު އަސާސީން ދީފަ އެވެ. އެހެންކަމުން މެމްބަރުން ދައްކާ ވާހަކަތަކަކަށް ފިޔަވަޅު އެޅުމުގެ ބާރެއް ނޯވެ އެވެ. އެހެންނަމަވެސް އިސްލާމް ދީނުގެ އަސާސަކާއި ހިލާފު ވާހަކައެއް މެމްބަރަކު ދައްކައިފިނަމަ އިމްތިޔާޒުތަކުން އެއްކިބާވާނެ އެވެ.
