އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ވަގުތީ ގޮތުން މަސައްކަތް ކުރާނެ 22 ނަރުހުން ހޯދަން އިއުލާންކޮށްފި އެވެ.
ނަރުހުން ހޯދަނީ އެއް އަހަރު ދުވަހުގެ މުއްދަތަކަށެވެ. އެއީ ހުޅުމާލެ މެޑިކަލް ފެސިލިޓީއާއި އެހެނިހެންވެސް ކޮވިޑް-19 އަށް ފަރުވާދޭ ތަންތަނުގައި މަސައްކަތް ކުރުމަށެވެ.
ޝަރުތެއްކަމަށް ކަނޑައަޅާފައިވަނީ ނާސިންގެ ދާއިރާއިން ގައުމީ ސަނަދުތަކުގެ އޮނިގަނޑު ލެވެލް 5 ނުވަތަ 6 ގެ ސަނަދެއް ހާސިލް ކޮށްފައިވުމެވެ.
ރަޖިސްޓާޑް ނަރުހުން އެކަމަށް ޝައުގުވެރިވާނަމަ ފޯމު ހުށަހަޅަން ހުޅުވައިލީ އަންނަ ބުދަ ދުވަހުގެ ނިޔަލަށެވެ. ފޯމު މެއިލް ކުރަން ޖެހެނީ [email protected] އަށެވެ. އިންޓަވިއު ބާއްވަނީ އަންނަ މަހުގެ 24 ވަނަ ދުވަހުގެ ކުރިންނެވެ.
ވަގުތީ ނަރުހުންގެ މުސާރައިގެ ގޮތުގައި އައިޖީއެމްއެޗުން ކަނޑައަޅާފައިވަނީ 9،060 ރުފިޔާ އެވެ. އަދި ސާވިސް އެލެވެންސްގެ ގޮތުގައި ދުވާލަކަށް 188 ރުފިޔާ ލިބޭނެ އެވެ.
