އެންޓި ކޮރަޕްޝަން ކޮމިޝަން (އޭސީސީ) މެންބަރެއްގެ ޒިންމާ އަދާނުކުރާކަމުގެ ތުހުމަތު ކުރެވިފައި ވަނިކޮށް އޭސީސީގެ މެންބަރު ކަމުން އިސްތިއުފާދެއްވި އަލީ އަޝްރަފް ޓެންޑާ ބޯޓުގެ ޗެއާޕާސަން ކަމަށް ހަމަޖައްސައިފި އެވެ.
ޓެންޑާ ބޯޑަކީ ފިނޭންސް މިނިސްޓްރީގެ ދަށުން ހިންގަމުން އަންނަ ދައުލަތުގެ ޕްރޮކިއުމަންޓުގެ ކަންކަން ހިންގާ ބަލަހައްޓާ މައި އިދާރާއެވެ. އެބޯޑަށް މެންބަރުން އައްޔަން ކުރައްވަނީ ފިނޭންސް މިނިސްޓަރެވެ. ދައުލަތުގެ ޕްރޮކިއުމަންޓުގެ ކަންކަމާ ގުޅޭ ގޮތުން ހަދަން ޖެހޭ އެންމެހާ އުސޫލުތައް އެކުލަވާލުމާއި ފަސް މިލިއަން ރުފިޔާއަށް ވުރެ މަތީގެ ސަރުކާރުގެ ހުރިހާ ބިޑްތަކެއް އިވެލުއޭޓްކޮށް މަސައްކަތްތައް ހަވާލު ކުރާނީ ޓެންޑާ ބޯޑުންނެވެ.
އެ ބޯޑުގައި އަޝްރަފާ އެކު ހަތް މެންބަރަކު ހިމެނެ އެވެ. އެބޭފުޅުންނަކީ:
1- އަލީ އިރުފާން
2- އުބައިދުﷲ އަލީ
3- އިކޮނޮމިކް މިނިސްޓްރީގެ ސްޓޭޓް މިނިސްޓަރު މުހައްމަދު އިޔާދު ހަމީދު
4- މުހައްމަދު ޖިނާން ސައީދު
5- މުމްތާޒު އަބްދުއް ރަޝީދު
6- އައިމިނަތު ޝީރީން
އަޝްރަފް މަގާމުން އިސްތިއުފާ ދެއްވީ ޕާރފޯމަންސް އޮޑިޓަކަށްފަހު އޭސީސީގެ މެމްބަރުން ވަކިކުރުމަށް މިނިވަން މުއައްސަސާތަކާއި ބެހޭ ކޮމިޓީން 11 ނޮވެންބަރު 2021 ގައި ނިންމާފައިވަނިކޮށެވެ. ކޮމިޓީގެ ބައްދަލުވުމުގައި މިގޮތަށް ނިންމާފައިވަނީ، އެ ކޮމިޝަނުން މައްސަލަތައް ބެލުމުގައި ލަސްކަމާއި، ތަކުރާރުކޮށް މިނިވަން މުއައްސަސާތަކާއި ބެހޭ ކޮމިޓީއަށް ހާޒިރު ކުރުމަށް ފަހު، ހޯދި މައުލޫމާތުތަކުގެ މައްޗަށް ބިނާކޮށެވެ.
އޭސީސީގެ މެންބަރުކަމަށް އަޝްރަފް އައްޔަން ކޮށްފައި ވަނީ 2019 ވަނަ އަހަރުގެ ސެޕްޓެމްބަރު މަހުގެ ތެރޭގައެވެ.
އަޝްރަފް އޭސީސީގެ މެންބަރު ކަމުން އިސްތިއުފާ ދެއްވީ އޭސީސީގެ މެންބަރުން މަގާމުގެ ޒިންމާތަކާއި މަސްއޫލިއްޔަތުތައް އަދާނުކުރާ ކަމަށް ބުނެ އޭސީސީގެ މެންބަރުން ވަކިކުރުމުގެ މަޝްވަރާތައް މަޖިލީހުގައި ފެށުމާއި ގުޅިގެން ޑިސެމްބަރު 2 ވަނަ ދުވަހު އެވެ.
