ރާއްޖޭގެ ކަނޑުގެ ރީތި ދިރުންތައް ދައްކުވައިދޭ އުރީދޫ މޯލްޑިވްސްގެ 2022 ވަނަ އަހަރުގެ ޑެސްކު ކަލަންޑަރު މުޅިން ހިލޭ ހޯދުމުގެ ފުރުސަތު އެކުންފުނިން ހުޅުވާލައިފިއެވެ.
އުރީދޫން ކޮށްފައިވާ ޓުވީޓަކަށް މިމަހުގެ 27 ވަނަ ދުވަހުގެ ނިޔަލަށް ރަނގަޅު ޖަވާބުދޭ ފަރާތްތަކުގެ ތެރޭގައި ގުރުއަތުން ހޮވޭ ފަރާތަކަށް އީޖާދީ އޮގްމެންޓެޑް ރިއަލިޓީ ހިދުމަތް މެދުވެރިކޮށް ރާއްޖޭގެ ރީތި ދިރުންތައް ދިރުވައި އާލާކޮށްދޭ އެ ތަފާތު ކަލަންޑަރު ލިބޭނެ ކަމަށް އެކުންފުނިން ބުނެއެެވެ.
ރާއްޖޭގެ ފަތުރުވެރިކަމުގެ ރަންޔޫބިލް ފާހަގަކުރުމުގެ މުނާސަބާތާވެސް ގުޅުވާލައިގެން ފަރުމާކޮށްފައިވާ މި ކަލަންޑަރުން ކޮންމެ މަހެއްގެ ކުރު ތައާރަފަކާއެކު ރާއްޖޭގައި އާއްމުކޮށް ފެންނަ ތަފާތު ދިރުންތަކެއް ދައްކުވައިދެއެވެ. ކަލަންޑަރު ބޭނުންކުރާ ފަރާތްތަކަށް އެ މަހަކަށް ހާއްސަކޮށްފައިވާ ސޮފުހާއިން ފެންނަ ސްނެޕްޗެޓް ކޯޑް ސްކޭންކޮށް ކަލަންޑަރުން ފެންނަ ރާއްޖޭގެ ދިރުންތަކުގެ އޮގްމެންޓެޑް ރިއަލިޓީ ތަޖުރިބާ ކޮށްލެވޭނެއެވެ.
އޭގެ އިތުރުން އޭއާރު ފީޗާގައި ހުރިހާ އުމުރަކާ ގުޅުވާލައި ކޮންމެ މަހަކަށް ހާއްސަ ކުރެވިފައިވާ ދިރުން ތައްޔާރުކޮށްލެވޭ އޮރިގަމީ ކަރުދާހެއްވެސް ކަލަންޑަރުގައި ހިމަނާފައިވާ އިރު، ކޮންމެ މަހަކަށް އޮރިގަމީ ހެދުމަށް ތަފްސީލީ އިރުޝާދު ދޭ ވީޑިއޯއެއް އުރީދޫގެ ވެބްސައިޓުން ފެންނަން ހުންނާނެއެވެ. ކިއުއާރު ކޯޓު ސްކޭން ކުރުމުން އެ ވީޑިއޯ ހުޅުވޭނެއެވެ.
