ޔޫކްރެއިންގައި ތިބި އިތުރު ދިވެހިންނަށް ފައިސާގެ އެހީތެރިކަން ސަރުކާރުން ފޯރުކޮށްދީފިއެވެ.
ހަޔަރ އެޑިއުކޭޝަން މިނިސްޓްރީން މިރޭ ބުނީ ޔޫކްރެއިންގައި ތިބި ދިވެހި 6 ދަރިވަރުންނާއި 3 މެމްބަރުން ތިބި އާއިލާއަށްވެސް ފައިސާގެ އެހީތެރިކަން ފޯރުކޮށްދީފައިވާކަމަށެވެ. އެފަރާތްތައް މިހާރު ޔޫކްރެއިންގެ ޚަރްކީވްއިން ނުކުމެ ރައްކާތެރިކަމާއެކު ލިވީވްއަށް އެތެރެވެފައިވާކަމަށް އެ މިނިސްޓްރީން ބުންޏެވެ.
މިހާރު ޔޫކްރެއިނުގައި ތިބީ، ނިފްރޯގައި ހުރި ދަރިވަރާއި، ޚަރްކީވްގައި ތިބި ފަސް ދަރިވަރުންގެ އިތުރުން އެ ސިޓީގައި ތިބި ތިން މެންބަރުންގެ އާއިލާއެވެ. މި އެންމެން ވެސް މިހާރު ދަނީ ޔޫކްރެއިނުގެ ހުޅަނގުގައި އޮންނަ ހަންގޭރީ ބޯޑަރާ ދިމާލަށް ދަތުރު ކުރަމުންނެވެ.
ފޮރިން މިނިސްޓްރީން ބުނީ ބެލަރުސްގައި ތިބި ދިވެހި ދަރިވަރުންގެ ތެރެއިން އެނބުރި ރާއްޖެއަށް އަންނަން 11 ދަރިވަރުން ބޭނުންވެގެން އެދިފައިވާކަމަށާއި އެމީހުންވެސް މާލެ އައުމަށްޓަކައި ފޯރުކޮށްދޭ އެހީތެރިކަން ސަރުކާރުން ފޯރުކޮށްދެމުން ގެންދާނެކަމަށެވެ. އަދި ބެލަރުސްގައި އިތުރު ނުރައްކާތެރިކަމެއް ނެތްކަމަށް ބެލެވޭތީ ޔުނިވަރސިޓީގެ ކްލާސްތައްވެސް އާދައިގެމަތިން ކުރިއަށްގެންދިޔުމަށް ނިންމާފައިވާ ކަމަށް އެމިނިސްޓްރީން ބުނެއެވެ.
ފޮރިން މިނިސްޓްރީން ބުނެފައިވަނީ ޔޫކްރެއިންގައި ތިބި ދިވެހިންނަށް އެހީތެރިވުމުގެ މަސައްކަތް މިހާރުވެސް ކުރަމުން އަންނަކަމަށެވެ. އެގޮތުން ޔޫކްރެއިންގައި އަސާސީ ތަކެތީގެ އަގުބޮޑުވަމުންދާތީ، އެޤައުމުގައި މިހާރު ތިބި ދިވެހިންނަށް ފައިސާގެ އެހީ ފޯރުކޮށްދިނުމަށް ނިންމާފައިވާކަމަށް ފޮރިން މިނިސްޓްރީން ބުނެއެވެ.
ރަޝިޔާއިން ޔޫކްރޭނަށް ހަމަލާދޭން ފެށިއިރު އެ ގައުމުގައި 27 ދިވެހިން ތިއްބެވެ. އޭގެ ތެރޭގައި އިވަނޯ ފްރެންކިވްސްކްގައި ތިބި 15 ދަރިވަރުންނާއި ކީވްގައި ތިބި އާއިލާއަކާއި ޚަރްކީވްފައި ތިބި އާއިލާގެ އިތުރުން ނިފްރޯގައި ހުރި ދަރިވަރު ހިމެނެއެވެ. އިވަނޯގައި ތިބި ދަރިވަރުން މިދިޔަ ހޮނިހިރު ދުވަހު ހަންގޭރީއަށް އެތެރެވުމަށްފަހު މިހާރު ވަނީ ރާއްޖެ އައިސްފައެވެ.
