ޖިންސީ ކުށުގެ ދައުވާތަކެއް ލިބޭ ކުރީގެ ޓޫރިޒަމް މިނިސްޓަރު އަލީ ވަހީދު ރާއްޖެއިން ބޭރަށް ފޮނުވާލުމުގައި ޖާމިނުވި ޔޫތު މިނިސްޓްރީގެ ކުރީގެ ސްޓޭޓް މިނިސްޓަރ އަސްހަދު ޢަލީގެ މައްޗަށް އިއްވާފައިވާ ޖަލުހުކުމް ތަންފީޒުކޮށް ނިމި ޖަލުން މިނިވަން ވެއްޖެއެވެ.
ކަރެކްޝަނަލް ސަރވިސް އިން ބުނީ 15 ދުވަހުގެ ޖަލު ހުކުމް ތަންފީޒު ކުރުމާއި އެކު އަޑުބަރޭ ޖަލުން މިނިވަންވެފައިވާ ކަމަށެވެ.
އަޑުބަރޭ 15 ދުވަހަށް ޖަލަށް ލާން ކްރިމިނަލް ކޯޓުން ހުކުމްކޮށްފައިވަނީ މިދިޔަމަހުގެ 2 ވަނަ ދުވަހުއެވެ. އޭނާ ހުކުމް ތަންފީޒު ކުރަން ފެށީ މިދިޔަ މަހުގެ 20 ވަނަ ދުވަހުއެވެ. އަލީ ވަހީދުގެ ބަދަލުގައި ކޯޓުގައި ޖާމިނުވެ އަޑުބަރޭ އެއްބަސްވެފައި ވަނީ އަލީ ވަހީދު ބޭސްފަރުވާއަށް ފުރާތާ ހަތަރު މަސް ތެރޭ އޭނާ އަނބުރާ ރާއްޖެއަށް ގެނައުމަށެވެ. ޖަލަށް ލާން ހުކުމްކުރީ އެ މުއްދަތުގައި އޭނާ ގެނެވިފައި ނުވާތީއެވެ.
އަޑުބަރޭއަށް 15 ދުވަހުގެ ޖަލު ހުކުމެއް އަޔަސް ދައުލަތުން އެދުނީ އެއް އަހަރަށް ޖަލަށް ލުމަށެވެ. އަސްހަދަށް ކުރި ހުކުމާއި ގުޅިގެން ރައީސުލްޖުމްހޫރިއްޔާ ވަނީ ހުކުމްކުރިތާ ކުޑަ ވަގުތުކޮޅެއްގެ ތެރޭގައި އޭނާ މަގާމުން ވަކި ކުރައްވާފައެވެ.
