ރާއްޖޭގައި ހިންގާ ބޭންކުތަކުން ދޫކުރާ ވިސާ ކާޑުތަކުން ރާއްޖޭގައި ޑޮލަރުގެ މުއާމަލާތް ނުކުރެވޭ ގޮތް ހަދަން ނިންމި އުސޫލަށް އަމަލު ކުރުން ފަސްކޮށްފި އެވެ.
މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މީގެ ކުރިން ކުރި އިއުލާނެއްގައި ވަނީ ރާއްޖޭގެ ބޭންކުތަކުން ދޫކުރާ ވިސާ ކާޑުތަކުން، މިދިޔަ މަހުގެ 15 އިން ފެށިގެން ޓްރާންސެކްޝަންތައް ހިންގޭނީ ދިވެހި ރުފިޔާއިން ކަމަށެވެ. އެހެންނަމަވެސް މިއަދު އެ އޮތޯރިޓީން ބުނީ އެ އުސޫލަށް އަމަލު ކުރުން އަންނަ އޯގަސްޓު މަހުގެ 15 އަށް ފަސްކުރަން ނިންމާފައިވާ ކަމަށެވެ.
މި ނިންމުމަށް އަމަލުކުރުން ފަސްކުރީ ކޮވިޑް-19 ގެ ހާލަތު އިތުރަށް ގޯސްވެ، ރައްކާތެރިކަމުގެ ގޮތުން އިތުރު ފިޔަވަޅުތަކެއް އަޅާފައިވާ ދަނޑިވަޅެއްގައި، ހިދުމަތްދޭ ފަރާތްތަކަށް ގޮންޖެހުންތަކެއް ހުންނާނެ ކަމަށް ގަބޫލުކުރެވޭތީ ކަމަށް އެމްއެމްއޭ އިން ބުންޏެވެ.
އެމްއެމްއޭ އިން މިބަދަލު ގެންނަނީ "ނެޝަނަލް ނެޓް ސެޓްލްމަންޓް ސާވިސް" ރާއްޖޭގައި ތައާރަފްކުރުމާ އެކު އެވެ.
ރާއްޖޭގެ ބައެއް ވިޔަފާރީގެ ހިދުމަތްދޭ ތަންތަނުގައި ދިވެހި ރުފިޔާ ވިސާ ކާޑުތަކުންވެސް ޑޮލަރުން ޓްރާންސެކްޝަން ހަދަ އެވެ. މިގޮތަށް ހަދަނީ އެކަމަށް ހާއްސަ މެޝިންތަކެއް ބޭރުން ގެނަސްގެންނެވެ.
ވިސާގެ "ނެޝަނަލް ނެޓް ސެޓްލްމަންޓް ސާވިސް"ގެ ގޮތުގައި އެމްއެމްއޭއިން ކަނޑައަޅާފައި ވަނީ ރާއްޖޭގެ ގައުމީ ބޭންކް، ބީއެމްއެލް އެވެ. އެހެންކަމުން ރާއްޖޭގައި ދޫކުރާ ހުރިހާ ވިސާ ކާޑެއްގެ މައިގަނޑު ސެޓްލްމަންޓް ހަދާނީ ބީއެމްއެލް އިންނެވެ.
ކޮވިޑް-19 ގެ ހާލަތާއެކު ރާއްޖޭގެ އިގްތިސޯދު ވަރަށް ބޮޑަށް ވަނީ ދަށަށް ގޮސްފަ އެވެ. މިއާއެކު މިހާރު ކަޅު ބާޒާރުގައި ޑޮލަރުގެ އަގު ހުރީ 18 ރުފިޔާ އާއި 20 ރުފިޔާ އާއި ދެމެދު އެވެ. އެމްއެމްއޭއިން ދަނީ ސަރުކާރާއި ގުޅިގެން ޑޮލަރުގެ ދަތިކަން ހައްލު ކުރަން މަސައްކަތް ކުރަމުންނެވެ.
+1
+1
+1
+1
+1
+1
