މާލޭގެ ގެއެއްގެ ތެރޭގައި ބިދޭސީ ދެމަފިރިއެއްގެ ދެމެދުގައި ހިނގި މާރާމާރީގައި އަންހެންމީހާ އަށް ތޫނު އެއްޗަކުން ހަމަލާދިން މައްސަލައިގައި ފިރިހެން މީހާ އަށް ދައުވާ ކުރަން ފޮނުވައިފި އެވެ.
މި މައްސަލައިގައި ދައުވާ އުފުލާފައިވަނީ އިންޑިއާގެ ރައްޔިތެއް ކަމަށްވާ ސްރިނިވަސަން ސުބްރަމަނިގެ މައްޗަށެވެ.
އެކަމާ ގުޅޭގޮތުން ޕްރޮސެކިއުޓަރ ޖެނެރަލް އޮފީހުން ބުނީ، 02 ފެބްރުވަރީ 2022 ދުވަހު، މާލޭ ގެއެއްގެ ތެރޭގައި، އޭނާގެ އަނބިމީހާއަށް ވަޅިން ހަމަލާދިން މައްސަލައިގައި ސްރިނިވަސަން ސުބްރަމަނިގެ މައްޗަށް، ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދަށުން، ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދަޢުވާ ކުރުމަށް 10 މާރިޗު 2022 ގައި ކްރިމިނަލް ކޯޓަށް ހުށައަޅާފައިވާ ކަމަށެވެ.
އަދި އޭނާ މިހާރުވެސް ހުރީ ކްރިމިނަލް ކޯޓުގެ އަމުރެއްގެ ދަށުން ބަންދުގައެވެ. އެގޮތުން 10 މާރިޗު 2022 ދުވަހު ބޭއްވުނު ބަންދުގެ އަޑުއެހުމުގައި ދައުލަތުން އެދިފައިވަނީ އޭނާ ޝަރީޢަތް ނިމެންދެން ބަންދު ކޮށްދިނުމަށް ކަމަށް އެ އޮފީހުން ބުނެ އެވެ.
އަންހެން މީހާއަށް އައިޖީއެމްޗް ހޮސްޕިޓަލުގައި ފަރުވާދީފައިވާއިރު އެމީހާ އެގެއިން ނެރެގެން ގެންދާ ވީޑިއޯއެއް ވަނީ ސޯޝަލް މީޑިއާގައި އާންމުވެފަ އެވެ.
