މިއަހަރުގެ އުރީދޫ މަސް ރޭސް ފަށައިފިއެވެ.
އުރީދޫ މަސް ރޭސް ބާއްވާފައި މިވަނީ، ކޮވިޑުގެ ބަލިމަޑުކަމުގެ ސަބަބުން ދެ އަހަރުގެ މެދުކެނޑުމަކަށް ފަހުއެވެ.
އުރީދޫން ބުނި ގޮތުގައި، މަސް ރޭހުގެ ޓީމުތައް، އިއްޔެ މަހަށް ފުރީ 14:00 ގައެވެ. އިއްޔެ މަހަށް ފުރީ ހަ ޓީމެވެ.
މިއަހަރުގެ މަސް ރޭހުގައި 23 ޓީމެއް ބައިވެރިވާއިރު އެއްވަނައަށް ދާ ޓީމަށް 50،000 ރުފިޔާ ދޭން އުރީދޫން ވަނީ ނިންމައިފައެވެ.
އުރީދޫ މަސް ރޭހުގައި އިއްޔެ މަހަށް ފުރި ޓީމުތަކަށް މަރުހަބާ ކިޔަން އުސްފަސްގަނޑު ސަރަހައްދުގައި ޖަޖުންނާއި އޮފިޝަލުން އިންތިޒާރުގައި ތިބިއިރު އެ ތަނުގައި ހަބޭސް ބޮޑުބެރު ޓީމުން ދިޔައީ ބޮޑުބެރުގެ ހަރަކާތްތައް ކުރިއަށް ގެންދަމުންނެވެ.
އިއްޔެ އެންމެ ފުރަތަމަ މަސް ކިރުވުމަށް އުސްފަސްގަނޑަށް އައީ، މޯލްޑިވްސް ޕޯސްޓް އޮފީހުގެ "ޓީމް ޕޯސްޓް" އެވެ. ދެން އައީ ޓީމް އާރްޑީސީ އެވެ. މަސް ކިރާ ސަރަހައްދަށް ތިން ވަނައަށް އައީ ޓީމް ގޯޅިއަންސް އެވެ.
މަސްކިރަން އެންމެ ފަހުން އައީ މަސްރޭހުގެ އެންމެ ފަހުގެ ޗެމްޕިއަނުން ކަމަށްވާ "ޓީމް ބޮއި" އެވެ. އިއްޔެ އެންމެ ބަރުމަސް ބާނާފައިވަނީ ޓީމް އާރްޑީސީންނެވެ. އެއީ 11.95 ކިލޯގެ މަހެކެވެ.
އުރީދޫ މަސްރޭސް ބާއްވާނީ ރޯދަ މަހުގެ ކޮންމެ އަންގާރަ އަދި ހޮނިހިރު ދުވަހެއްގެ ރޭގަނޑެވެ. ނަމަވެސް ރޯދަ މަހުގެ ފަހު ދިހައިގެދުވަސްތަކުގައި މުބާރާތް ނޯންނާނެއެވެ.
