ބޭންކް އޮފް މޯލްޑިވްސް (ބީއެމްއެލް)ގެ ކޮމިއުނިޓީ ފަންޑުގެ ދަށުން ކ. މާފުށީގައި ފޮތް ކިއުމަށް މަޑުކޮށްލާނެ ހާއްސަ ތަނެއް ހަދައިފިއެވެ.
މާފުށީގައި ދިރިއުޅޭ ފަރާތްތަކާއި ޒިޔާރަތްކުރާ ފަރާތްތައް މަޑުކޮށްލާނެ ހިތްފަސޭހަ މާހައުލެއް ހޯދައިދިނުމަށާއި އެތަނުގައި މަޑުކޮށްލާ ވަގުތަކީ ފައިދާ ހުރި ވަގުތުކޮޅަކަށް ހެދުމުގެ މަގުސަދުގައި "ފޮތް ގުންޒަރު"ގެ ނަމުގައި އެ މަޝްރޫއު ހިންގާފައިވަނީ ނިއު ސްޓާ ސްޕޯޓްސް ކުލަބުންނެވެ.
ރަށުގެ ބަނދަރު ސަރަހައްދުގައި ގާއިމުކޮށްފައިވާ މި ފޮތް ގުންޒަރުގައި އެކި އުމުރު ފުރާތަކަށް ހާއްސަ ފޮތް އެކުލެވެއެވެ. އަދި ބޭރުގައި ބެންޗު ބަހައްޓައި އަދި އިންޑޯ ބައިގައި ބީން ބޭގުވެސް ވަނީ ބަހައްޓައިފައެވެ.
މި މަޝްރޫއާ ގުޅޭގޮތުން ނިއު ސްޓާ ސްޕޯޓްސް ކްލަބުން ބުނީ މި ފޮތް ގުންޒަރަކީ ރަށުގެ ރައްޔިތުންނާއި ފަތުރުވެރިން ހިތްފަސޭހަ މާހައުލެއްގައި ދިމާވެ ފޮތްކިޔާލުމަށް ރަނގަޅު ތަނެއް ކަމަށެވެ. އަދި މީގެ ކުރިން ނަމަ ފޮތް ކިޔަން މަޑުކޮށްލާނެ ޖާގައެއް ނެތުމުން ޖެހެނީ ބަނދަރު މަތީގައި ހުންނަ ކެފޭ އެއްގައި މަޑުކޮށްލަން ކަމަށާއި ނަމަވެސް ފޮތް ގުންޒަރާ އެކު އެ މައްސަލައަށް ހައްލެއް ލިބިފައިވާ ކަމަށް ބުންޏެވެ.
ބީއެމްއެލް ކޮމިއުނިޓީ ފަންޑަަކީ އާންމު ފަރުދުންނާއި ހިލޭ ސާބަހަށް މަސައްކަތްކުރާ ޖަމިއްޔާތަކަށް އަމާޒުކޮށްގެން ރަށްރަށުގައި ދެމެހެއްޓެނެވި ގޮތެއްގައި މަޝްރޫއުތައް ހިންގުމަށް ހުޅުވާލެވޭ ފުރުސަތެކެވެ.
ރާއްޖޭގެ ހުރިހާ އަތޮޅެއް ހިމެނޭހެން މިހާތަނަށް 65 މަޝްރޫއަށް މާލީ އެހީތެރިކަން ފޯރުކޮށްދީފައިވާ އިރު، ކ. އަތޮޅުގެ ތިން ރަށަކަށް ވަނީ އެހީތެރިކަން ފޯރުކޮށްދީފަ އެވެ. މި ރަށްތަކަކީ ގާފަރު، ކާށިދޫ އަދި މާފުއްޓެވެ.
