ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމަށް ޓޫރިޒަމް މިނިސްޓްރީން ކުރިއަށް ގެންދާ 'ނަލަ ނަލަ ރާއްޖެ' ސޯޝަލް މީޑިއާ ކޮންޓެސްޓްގެ އެސޯޝިއޭޓް ޕާޓްނަރަކަށް އުރީދޫ ހަމަޖައްސަައިފި އެވެ.
ނަލަ ނަލަ ރާއްޖެ' ވީޑިއޯ ޗެލެންޖަކީ ޓޫރިޒަމް މިނިސްޓްރީން ކުރިއަށް ގެންދާ ލިޕް ސިންކްކުރާ ސޯޝަލް މީޑިއާ މުބާރާތެކެވެ. މި ވީޑިއޯ ޗެލެންޖުގައި ބައިވެރިވުމުގެ ފުރުސަތު ދިވެހިންނާއި ބޭރު މީހުންނަށް ވެސް ހުޅުވާލާފައި ވާއިރު 'ނަލަ ނަލަ ރާއްޖެ' ތީމް ލަވައަށް ލިޕް ސިންކު ކުރާ ވީޑިއޯއެއް އެ ބައިވެރިއެއްގެ ފޭސްބުކް، އިންސްޓަގްރާމް ނުވަތަ ޓިކްޓޮކް އެކައުންޓުގައި ހޭޝްޓެގްތަކާ އެކު ޕޯސްޓް ކޮށްލުމުން މި ޗެލެންޖުގައި ބައިވެރިވެވޭނެއެވެ.
އުރީދޫން މިއަދު ނެރުނު ބަޔާނެއްގައި ބުނި ގޮތުގައި، އެސޯޝިއޭޓް ޕާޓްނަރެއްގެ ހައިސިއްޔަތުން އުރީދޫގެ ހިދުމަތްތައް ފޯރުކޮށްދޭ 10 ގައުމުގައި ތިބި 117 މިލިއަނަށް ވުރެ ގިނަ މީހުންނަށް މި ވީޑިއޯ ޗެލެންޖް ޕްރޮމޯޓްކުރާނެ އެވެ. ވަނަތަކަށް ހޮވޭ ފަރާތްތައް ކަނޑައަޅާނީ ދިވެހިންނާއި ބޭރު މީހުން ވަކިންނެވެ. ވަނަތަކަށް ހޮވޭ ދިވެހި ނަސީބުވެރި ފަރާތްތަކަށް 25،000ރ އާ ހަމައަށް ފައިސާގެ އިނާމުގެ އިތުރުން، އުރީދޫ މައިފައި ޑިވައިސްއެއް ދިނުމަށް ވަނީ ނިންމައިފައެވެ. އަދި ވަނަތަކަށް ހޮވޭ ބޭރު މީހުންނަށް ހޮލިޑޭ ޕެކޭޖަކާ އެކު އުރީދޫ ޓޫރިސްޓް މައިފައި ޑިވައިސްއެއް ދޭން ވަނީ ނިންމައިފައެވެ.
މިދިޔަ މަހުގެ 12 ގައި ފެށި މި ޗެލެންޖު އަންނަ މަހުގެ ނިޔަލަށް ކުރިއަށް ގެންދަން ހަމަޖެހިފައިވާ އިރު، މި ޗެލެންޖުގައި ކޮންމެ ބައިވެރިއަކަށްވެސް ގިނަވެގެން ތިން ވީޑިއޯ ޕޯސްޓް ކުރުމުގެ ފުރުސަތު އޮންނާނެއެވެ.
ވަނަތައް ހޮވުމުގައި ބައިވެރިން ކެޓަގަރައިޒް ކުރާނީ ކޮންމެ ސޯޝަލް މީޑިއާ ޕްލެޓްފޯމެއްގައި ވެސް އެ ޕްލެޓްފޯމެއްގައި ބައިވެރިންގެ ފޮލޯވާ ބޭސްއަށް ބިނާކޮށެވެ. އަދިި ހާއްސަ ޖަޖުންގެ ޕެނަލަކުން ވަނަތައް ހޮވައި ކޮންމެ ކެޓަގަރީއަކުން ވެސް އެންމެ ގިނަ ވިއުޒް، ލައިކްސް، އަދި ޝެއާ ލިބޭ ވީޑިއޯތަކަށް "ޕްރޯ ރަޓާ" އުސޫލުން ޕޮއިންޓް ދިނުމަށް ބަނީ ހަމަޖެހިފައެވެ.
