ގްރިޑް ފެއިލްވެ ބަންގްލަދޭޝްގެ އެކިހިސާބުތަކުން ކަރަންޓު ދިއުމުގެ ސަބަބުން އެގައުމުގެ 96 މިލިއަން މީހުންނަށް އަސަރު ކޮށްފި އެވެ.
ބަންގްލަދޭޝްގެ ޕަވަރ ގްރިޑް ކޯގެ އެގްޒެކެޓިވް ޑިރެކްޓަރު ޔެއަކޫބް އެލާހީ ޗޯދަރީ ވިދާޅުވީ ޓްރާންސްމިޝަން ލައިނެއް އޯވަލޯޑް ވުމުން އެގައުމުގެ އަށް އިދާރީ ޑިވިޝަންގެ ތެރެއިން ހަތަރު ޑިވިޝަނުން އަންގާރަ ދުވަހު ކަރަންޓް ކެނޑުނު ކަމަށެވެ.
އޭނާ ވިދާޅުވީ މިރޭ ގާތްގަނޑަކަށް 9 ޖެހި އިރު އެގައުމުގެ ބޮޑު ބަޔަކަށް ކަރަންޓު ފޯރުކޮށްދެވިފައިވާ ކަމަށާއި އަދި ނުލިބޭ ސަރަހައްދުތަކުގައި ވެސް ކަރަންޓު ދިނުމުގެ މަސައްކަތް ކުރަމުންދާ ކަމަށެވެ.
"އިންޖިނިއަރުންނާއި ޓެކްނީޝަނުން ވަރުބަލިކަމެއް ނެތި ދަނީ ކަރަންޓު ދިނުމުގެ މަސައްކަތް ކުރަމުން" އެގްޒެކެޓިވް ޑިރެކްޓަރު ޔެއަކޫބް އެލާހީ ޗޯދަރީ ނެރުއްވި ބަޔާނުގައި ވދާޅުވިއެވެ.
އޭނާ ވިދާޅުވީ އެ ގައުމުގެ ކަރަންޓް ޑިވިޝަނަށް ބުރޫއެރި ސަބަބު ތަހުގީގު ކުރުމަށް ކޮމިޓީއެއް އެކުލަވާލަން ނިންމާފައިވާ ކަމަށެވެ. އަދި ކަރަންޓް ހުރިހާ ހިސާބަކަށް ވަރަށް އަވަހަށް ލިބޭނެ ކަމަށެވެ.
ރޭ ބަންގްލަދޭޝްއިން ކަރަންޓް ދިއުމުގެ ސަބަބުން އެގައުމުގެ ފިހާރަތަކުގައި މީހުންނަށް ޚިދުމަތް ދިނުމަށް ބޭނުންކުރީ ފޯނުގެ ލައިޓާއި އުއްބައްތި އެވެ.
އެތައް ގަޑިއިރެއް ވަންދެން ކަރަންޓް ކެނޑުމުގެ ސަބަބުން އެގައުމުގެ އެޕާޓްމަންޓް ބްލޮކްތަކުން ބޭނުންކުރި އަމިއްލަ ބެކަޕް ޖަނަރޭޓަރުތައް ނިއްވާލަން މަޖުބޫރުވި އެވެ.
