ރައީސް އިބްރާހީމް މުހައްމަދު ސޯލިހު މިހާރު ބަހްރައިނަށް ކުރައްވަމުންގެންދަވާ ދަތުރުފުޅުގެ ތެރެއިން އެގައުމާއެކު ގުޅުން ބަދަހިކުރުމާގުޅޭ ހަތަރު އެއްބަސްވުމެއްގައި މިއަދު ސޮއިކޮށްފިއެވެ.
ރައީސް އޮފީހުން ބުނީ، އެ އެއްބަސްވުންތައް ބަދަލު ކުރެއްވުމަށް، ބަހްރައިންގެ އަލް ޤުޟައިބިއްޔާ ޕެލަސްގައި ބޭއްވި ރަސްމިއްޔާތުގައި، ސޯލިހުއާއި ބަހްރައިންގެ ރަސްގެފާނު، ހަމަދު ބިން އީސާ އަލް ހަލީފާ ބައިވެރިވެވަޑައިގެންނެވި ކަމަށެވެ.
ބަހްރެއިންގެ ރަސްގެފާނު ހަމަދު ބިން އީސާ އަލް ހަލީފާގެ ދައުވަތަކަށް ރައީސްގެ ދެކަނބަލުންނާއި ބައެއް ވަޒީރުންގެ މިހާރު ބަހްރެއިނަށް ކުރައްވަމުން ގެންދަވާ ދަތުރުފުޅުގެ ތެރެއިން ސޮއިކުރީ ބައިނަލްއަގްވާމީ ގުޅުންތަކާ ބެހޭގޮތުން ދެ ގައުމުން ހިޔާލާއި މަޝްވަރާ ބަދަލުކުރުމާ ބެހޭ އެއްބަސްވުމަކާއި ޒުވާނުންނާއި ކުޅިވަރު ކުރިއެރުމުގެ ދާއިރާއިން ދެގައުމުގެ މެދުގައި ގުޅުން ބަދަހިކުރުމުގެ އެއްބަސްވުމަކާއި މޫސުމީ ބަދަލުތަކާ ގުޅޭ ގޮތުން ދެގައުމުން ގުޅިގެން މަސައްކަތް ކުރުމުގެ އެއްބަސްވުމެއްގައެވެ.
މީގެ އިތުރުން ރާއްޖޭގެ ފޮރިން ސާވިސް އިންސްޓިޓިއުޓާއި ބަހްރެއިންގެ މުހައްމަދު ބިން މުބާރަކް އަލް ހަލީފާ އެކަޑަމީއާ ދެމެދު ވެސް އެއްބަސްވުމެއްގައި ވެސް ވަނީ ސޮއިކޮށްފައެވެ.
އެއްބަސްވުންތަކުގައި ސޮއިކުރުމަށް ބަހްރެއިންގެ ޝާހީ ގަނޑުވަރު، އަލް ގުޟައިބިއްޔާ ޕެލަސްގައި މިއަދު ބޭއްވި ރަސްމިއްޔާތުގައި ސޯލިހު އާއި ބަހްރައިންގެ ރަސްގެފާނު ހަމަދު ބިން އީސާ އަލް ހަލީފާ ބައިވެރިވެވަޑައިގެންނެވިއެވެ.
މިއަދު ބަދަލު ކުރެވުނު އެއްބަސްވުންތަކުގެ ތެރެއިންޒުވާނުންނާއި ކުޅިވަރު ކުރިއެރުމުގެ ދާއިރާއިން ދެގައުމުގެ މެދުގައި ގުޅުން ބަދަހިކުރުމުގެ އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ސްޕޯޓްސް މިނިސްޓަރު އަހުމަދު މަހުލޫފެވެ. އެހެން އެއްބަސްވުންތަކުގައި ރާއްޖޭގެ ފަރާތުން ސޮއިކުރެއްވީ ފޮރިން މިނިސްޓަރު އަބްދުﷲ ޝާހިދެވެ.
ރައީސް އޮފީހުން ބުނީ އިތުރު ދެ ދާއިރާއަކުން ދެ ގައުމުގެ ގުޅުން ބަދަހިކުރަން އެއްބަސްވުމުގައި ސޮއިކުރުމާ މެދު މަޝްވަރާ ކުރާނެ ކަމަށް ބަހްރެއިނުން މިއަދު ވަނީ އިއުލާންކޮށްފައެވެ. އެއީ ބަހްރެއިންގެ ސީ-ޓު-އެއާ ބައިވެރިއެއްގެ ގޮތުގައި ރާއްޖެ ހިމެނުމާއި ބަހުރައިންގައި ހުންނަ ޑޭޓާ ސެންޓަރުތަކުގައި ދިވެހި ސަރުކާރުގެ މައުލޫމާތު ރައްކާކޮށް، އަމިއްލައަށް ބެލެހެއްޓުމަށް ބަހުރައިނުން ފުރުސަތުދިނުމުގެ އެއްބަސްވުމެކެވެ.
ދެ ގައުމުގެ ގުޅުން އިތުރަށް ބަދަހި ކުރުމާ ގުޅޭ ގޮތުން ރައީސް ސޯލިހާއި ބަހުރެއިނުގެ ރަސްގެފާނު މިއަދު މަޝްވަރާ ކުރެއްވި ކަމަށް ރައީސް އޮފީހުން ބުންޏެވެ.
