ކޮވިޑުގައި އެންމެ ގިނަ މީހުން މަރުވީ އިއްޔެ އިންޑިއާގައި

އިއްޔެ އެކަނި ކޮވިޑް-19 ޖެހިގެން އިންޑިއާގައި މަރުވި މީހުންގެ އަދަދު 6،148 އަށް އަރައިފި އެވެ.
މިއީ މިހާތަނަށް އެއްގައުމަކުން 24 ގަޑިއިރުގެ ތެރޭގައި ކޮވިޑުގައި އެންމެ ގިނަ މީހުން މަރުވި އަދަދެވެ.
އިންޑިއާގެ ހެލްތު މިނިސްޓްރީން ކޮވިޑުގައި މީހުން މަރުވާ އަދަދު އާންމު ކުރިނަމަވެސް މި އަދަދަކީ އެންމެ ސައްހަ އަދަދަށް ނުވެދާނެ ކަމަށް ލަފާކުރެވެ އެވެ. އެއީ މިދިޔަ ބުދަ ދުވަހު ކޮވިޑުގައި މަރުވި މީހުންގެ އަދަދަކީ 5،400 މީހުން ކަމަށް ރިޕޯޓު ކުރިނަމަވެސް ފަގީރު ހިސާބުތަކުގައި މި ބަލި ޖެހިގެން ގިނަ ބަޔަކު މަރުވި ކަމަށް ވަނީ ރިޕޯޓުކޮށްފަ އެވެ. އެގޮތުން ރޮއިޓާޒްއިން ރިޕޯޓު ކުރި ގޮތުގައި ބުދަ ދުވަހު އެކަނިވެސް 9،400 މީހުން އިންޑިއާއިން މަރުވި ކަމަށް ލަފާ ކުރެވެ އެވެ.
މިދިޔަ ފެބުރުއަރީ މަހު އިންޑިއާގައި ކޮވިޑުގެ ދެވަނަ ރާޅެއް ފެށުނުއިރު އޭޕްރީލް މަހުގެ ތެރޭގައި އެގައުމު ވަނީ އެންމެ ނުރައްކާ ހާލަތަށް ގޮސްފަ އެވެ. އެއާއެކު ސިއްހީ ވަސީލަތްތައް ވަރަށް ބޮޑަށް މަދުވެ ބޮޑެތި ހޯލްތަކާއި ޕާކުތަކުގައިވެސް އެނދުތައް ބަހައްޓައިގެން ފަރުވާ ދޭން ޖެހުނެވެ.
އިންޑިއާގައި ކޮވިޑުގެ ހާލަތު އިންތިހާއަށް ގޯސްވީ އެގައުމުގައި އުފެދުނު އާ ވޭރިއެންޓެއްގެ ސަބަބުންނެވެ. އެގޮތުން މިހާތަނަށް ދުނިޔޭގައިވެސް އުފެދުނު އެންމެ ނުރައްކާ ވޭރިއެންޓުގެ ސަބަބުން ގިނަ ބައެއްގެ ހާލު ދެރަވެ މަރުވާ މީހުންގެ އަދަދުވެސް އިތުރުވި އެވެ. މި ވޭރިއެންޓު ފެތުރޭ ދުވެލި ހަލުވިވުމާއި ގުޅިގެން ދުނިޔޭގެ ގިނަ ގައުމުތަކަކަށް އެ ވޭރިއެންޓު ފެތުރުނުކަން ފާހަގަކޮށްލެވެ އެވެ.
މިހާތަނަށް ދުނިޔޭގައި ފެށި އެންމެ ބޮޑު ވެކްސިނޭޝަން ޕްރޮގުރާމް މިދިޔަ ޖެނުއަރީ މަހު އިންޑިއާގައި ފެށިނަމަވެސް ވެކްސިން އުފެއްދުމުގައި ލަސްތަކެއް އައުމާއި ގުޅިގެން ޕްރޮގުރާމް ވަރަށް ބޮޑަށް މަޑުޖެހުނެވެ. 1.2 ބިލިއަން މީހުންގެ އާބާދީ އޮންނަ އެގައުމުގައި މިހާތަނަށް 5 އިންސައްތަ މީހުންނަށްވެސް ވެކްސިން ދެވިފައެއް ނުވެ އެވެ.
އިންޑިއާގައި ކޮވިޑު ޖެހުނު މީހުންގެ އަދަދު ވަނީ 29 މިލިއަނަށް އަރައިފަ އެވެ. އަދި މަރުވި މީހުންގެ އަދަދަކީ 353،000 އެވެ.