ހުޅުމާލެ ހޮސްޕިޓަލުގެ ކަނބިލި ބިލްޑިންގައި މެންޓަލް ހެލްތު ސެންޓަރެއް ހުޅުވައިފި އެވެ.
މިއަދު ހެނދުނު ހުޅުމާލެ ހޮސްޕިޓަލުގެ މެންޓަލް ހެލްތު ސެންޓަރު (އެމްއެޗްސީ) ހުޅުވައިދެއްވީ ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހުމަދެވެ. އެ ސެންޓަރު ހުޅުވުމުގެ ރަސްމިއްޔާތުގައި ނައިބު ރައީސް ފައިސަލް ނަސީމް ވެސް ވަނީ ބައިވެރިވެވަޑައިގެންފަ އެވެ.
މި ސެންޓަރު ހުޅުވުމުގެ މައިގަނޑު މަގުސަދަކީ ވީހާވެސް ގިނަ ބަޔަކަށް ލުއިފަސޭހަކަމާއެކު ނަފްސާނީ ބަލިތަކަށް ފަރުވާ ހޯދޭނެ އިންތިޒާމު ހަރުދަނާ ކޮށްދިނުމެވެ. މި ސެންޓަރުން ހިދުމަތް ފޯރުކޮށްދޭން ފެށުމާއެކު، އައިޖީއެމްއެޗުގެ ސެންޓާ ފޯ މެންޓަލް ހެލްތު (ސީއެމްއެޗު)ގެ ވެއިޓްލިސްޓުގައި ތިބި މީހުންނަށް ވެސް އެމްއެޗްސްއަށް ޑޮކްޓަރަށް ދެއްކުމަށް ކޮންސަލްޓޭޝަން ހޯދުމުގެ ފުރުސަތު ލިބިގެންދާނެ އެވެ.
އަލަށް ހުޅުވި އެމްއެޗްސީގައި ދެ ކޮންސަލްޓޭޝަން ރޫމާއި، ފެ ފަރުވާ ދޭ ކޮޓަރީގެ އިތުރުން ކޮންފަރެންސް ރޫމެއް ހުރެ އެވެ. އެތަނުގައި ދެ ސައިކޭޓްރިސްޓުނަނާއި، ދެ ކްލިނިކަލް ސައިކޮލޮޖިސްޓުންގެ އިތުރުން ކައުންސިލަރެއް އަދި ދެ އެޑްމިނިސްޓްރޭޓިވް ސްޓާފުން ހިދުމަތް މަސައްކަތް ކުރާނެ އެވެ.
އެ ސެންޓަރުގައި މަސައްކަތްކުރާ ސައިކޮލޮޖިންޓުން ދުވާލެއްގެ މައްޗަށް 12 އާއި 15އާ ދެމެދުގެ އަދަދަކަށް ބަލި މީހުންނަށް ހިދުމަތްކުރާއިރު، ސައިކޭޓްރިސްޓުން ދުވާލެއްގެ މައްޗަށް 30 ބަލި މީހުންނަށް ހިދުމަތް ފޯރުކޮށްދޭނެ އެވެ. އެ ސެންޓަރުން ފޯރުކޮށްދެނީ ސައިކޭޓްރީ، ސައިކޮލޮޖީ، ކައުންސެލިން އަދި އޮންލައިން ކޮންސަލްޓޭޝަންގެ ހިދުމަތް ފޯރުކޮށްދޭނެ އެވެ. ހަމައެއާއެކު، އިންޑިއާގެ ކެޑެބަމްސް ގްރޫޕާ ގުޅިގެން އެތަނުގެ ފަންނީ މާހިރުން މެދުވެރިކޮށް، އޮންލައިންކޮށް 'ސުޕަ ސްޕެޝަލިސްޓް ކޮންސަލްޓޭޝަން' ވެސް އެމްއެޗްސީން ފޯރުކޮށްދޭނެ އެވެ.
އެމްއެޗްސީން ހެނދުނު 8:00 އިން ރޭގަނޑު 10:00 އަށް ހިދުމަތް ފޯރުކޮށްދޭއިރު، 24 ގަޑިއިރު އޮންކޯލް ސައިކޭޓްރިސްޓް ހިދުމަތް ފޯރުކޮށްދޭނެ އެވެ. އޮންކޯލް ސައިކޭޓްރިސްޓުގެ ހިދުމަތް ހޯދުމަށް އަދި އެމްއެޗްސީން އެޕޮއިންޓްމަންޓް ހެއްދުމަށް ވަނީ ކޯލް ސެންޓަރު ނަންބަރު 1417 ގާއިމްކޮށްފަ އެވެ.
