ތ އަތޮޅު ހިރިލަންދޫގައި މާރާމާރީއެއް ހިނގައި ދެ މީހަކަށް އަނިޔާވެއްޖެ އެވެ.
ފުލުހުން ބުނީ، ތ ހިރިލަންދޫ ގެއެއްގެ ތެރެއަށް ވަދެ މާރާމާރީ ހިންގާފައިވާކަމުގެ މައުލޫމާތު ރޭ 22:00 ހާއިރު ފުލުހުންނަށް ލިބިފައިވާ ކަމަށެވެ.
މާރާމާރީއާ ގުޅިގެން ތޫނު ހަތިޔާރު ބޭނުންކޮށްގެން މީހަކަށް އިންޒާރު ދިން މައްސަލައެއްވެސް ފުލުހުންނަށް ވަނީ ހުށައަޅާފަ އެވެ.
ފުލުހުން މައުލޫމާތު ދޭ ގޮތުގައި މި މާރާމާރީއާ ގުޅިގެން 49 އަހަރުގެ މީހަކާއި 43 އަހަރުގެ މީހަކަށް އަނިޔާވެ ހިރިލަންދޫ ސިއްޙީ މަރުކަޒުގައި ފަރުވާ ދޭން ޖެހިފައިވެ އެވެ. އެމީހުން ފަހުން ވަނީ އިތުރު ފަރުވާއަށް ތ ވޭމަންޑޫ ހޮސްޕިޓަލަށް ގެންގޮސްފަ އެވެ.
މި މާރާމާރީއާ ގުޅިގެން ފުލުހުންގެ އަމުރަށް ނުކިޔަމަންތެރިވެ، ރަށުގެ އަމާންކަން ނަގާލަން މަސައްކަތްކުރި ކަމުގެ ތުހުމަތުގައި 36 އަހަރުގެ މީހަކާއި، 32 އަހަރުގެ މީހަކު ވަނީ ހައްޔަރު ކޮށްފަ އެވެ. މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
