އަންނަ ސެޕްޓެމްބަރު މަހު 9 ގައި ބާއްވާ ރިޔާސީ އިންތިޚާބުގައި ވޯޓުލުމުގެ ޙައްގު ލިބެނީ 282،755 މީހުންނަށް ކަމަށް އިލެކްޝަންސް ކޮމިޝަން (އީސީ) އިން ހާމަކޮށްފިއެވެ.
އިންތިޚާބުތަކާ ބެހޭ އާންމު ޤާނޫނުގެ 9 ވަނަ މާއްދާގެ (ހ) ގައި ބަޔާންކުރާ ލިސްޓު އާންމު ކުރުމުގެ ކުރިން ވޯޓުދިނުމުގެ ހައްގު ލިބިފައިވާ މީހުންގެ ލިސްޓުގެ ސައްހަކަން ކަށަވަރު ކުރުމުގެ ގޮތުން އީސީން މިއަދު ހާމަކޮށްފައިވާ ގޮތުގައި ރާއްޖޭގައި ވޯޓުލުމުގެ ޙައްގު ލިބޭ 282،755 މީހުން ތިބިއިރު އޭގެ ތެރޭގައި ހިމެނެނީ 144،408 ފިރިހެނުންނާއި 138،347 އަންހެނުންނެވެ.
ކޮންމެ ރަށެއްގެ ލިސްޓުތައް ވަކިވަކިން އާއްމުކޮށްފައިވާއިރު ލިސްޓަށް ޝަކުވާ ހުށަހެޅުމުގެ ފުރުސަތު ވެސް ވަނީ މިހާރު ހުޅުވާލައިފައެވެ. އެގޮތުން ޝަކުވާ ފޯމު މެދުވެރިކޮށް އަންގާރަ ދުވަހުން ފެށިގެން 2023 މޭ 31 ވާ ބުދަ ދުވަހުގެ މެންދުރުފަހު 02:00 ގެ ނިޔަލަށް ޝަކުވާ ހުށަހެޅޭނެ ކަމަށް އީސީން ވަނީ ބުނެފައެވެ.
ޝަކުވާ ހުށަހަޅާ ފޯމު އިލެކްޝަންސް ކޮމިޝަނުގެ ވެބްސައިޓުންނާއި ކޮމިޝަނުގެ އިދާރާއިން ލިބެން ހުންނާނެ ކަމަށް އެ ކޮމިޝަނުން ބުނެ އެވެ. އެ ކޮމިޝަނުން ބުނީ ޝަކުވާ ހުށަހަޅާނީ ކޮމިޝަނުގެ އީމެއިލް[email protected]އަށް ނުވަތަ ރަސްމީ ގަޑީގައި ކައުންޓަރަށް ފޯމު ހުށަހަޅައިގެން ކަމަށެވެ.
މިއަހަރު ބާއްވާ ރިޔާސީ އިންތިޚާބުގައި 282،755 މީހުންނަށް ވޯޓު ލުމުގެ ޙައްގު ލިބިފައިވާ ކަމަށް އީސީން ހާމަކޮށްފައިވާއިރު އެންމެފަހުން 2018 ވަނަ އަހަރު ބޭއްވި ރިޔާސީ އިންތިޚާބުގައި ވޯޓުލުމުގެ ހައްގު ލިބިފައިވަނީ 263،000 މީހުންނަށެވެ. މިއީ އެފަހަރު ވޯޓުލީ މީހުންނަށް ވުރެ، 19،755 މީހުންގެ އިތުރުވުމެކެވެ.
ރިޔާސީ އިންތިޚާބުގެ ދެވަނަ ބުރެއް ބާއްވަން ޖެހިއްޖެނަމަ އީސީއިން ބާއްވަން ހަމަޖެހިފައިވަނީ ސެޕްޓެމްބަރު މަހުގެ 30 ވަނަ ދުވަހު އެވެ.
