ކެމްބޯޑިއާއަށް ދާ ދިވެހީންނަށް 30 ދުވަހުގެ އޮން އެރައިވަލް ވިސާ ދޭން ފަށައިފި އެވެ.
މިއީ މިދިޔަ ޖެނުއަރީ މަހު ކެމްބޯޑިއާގެ ބޮޑުވަޒީރު ސަމްދެކް އައްކާ މޮހަ ސެނާ ޕަޑައި ޓެކޯ ހުން ސެން ރާއްޖެއަށް ކުރެއްވި ދަތުރުފުޅަށް ފަހު ވެވުނު އެއްބަސްވުމުގެ ދަށުން ދޭން ފެށި އޮން އެރައިވަލް ވިސާ އެކެވެ. މިއީ ޓުއަރިސްޓް ވިސާއެކެވެ.
އެހެން ނަމަވެސް ދިގު މުއްދަތަށާއި ވިޔަފާރިއަށް ނޫނީ ތައިލީމު ހާސިލުކުރަން އެގައުމަށް ދާ މީހުން އަދިވެސް ވިސާ ނަގަން ޖެހޭނެ އެވެ.
ކެމްބޯޑިއާގެ ބޮޑުވަޒީރު ރާއްޖެއަށް ކުރެއްވި ދަތުރުފުޅުގައި ވަނީ ގިނަ އެއްބަސްވުންތަކުގައި ސޮއި ކުރައްވައިފަ އެވެ.
އޭގެ ތެރޭގައި ކެމްބޯޑިއާއިން ރާއްޖެ އަށް ހަނޑޫ އެތެރެކުރުމަށާއި ކެމްބޯޑިއާއިން ޒުވާރި، މިރުސް، ދަނޑިއަލުވި އަދި ކެޝޫނަޓް ފަދަ ބާވަތްތައް އެތެރެކުރުމާއި އެ ގައުމުން ރާއްޖެއށް މޭވާގެ ބާވަތްތައް އެތެރެކުރުމާއި، ފޭރާމާއި ދަތުރުފަތުރާ ގުޅުން ހުރި މުދަލާއި ލަކުޑި އެތެރެ ކުރުމުގެ އިތުރުން ރާއްޖެއިން ދަޅު މަހާއި ކަނޑު މަހުގެ އުފެއްދުންތައް ކެެމްބޯޑިއާ އަށް އެކްސްޕޯޓު ކުރުމަށެވެ.
ރާއްޖެއާއި ކެމްބޯޑިއާއާ ދެމެދު ސިޔާސީ ގުޅުން ޤާއިމްކޮށްފައިވަނީ 1995 ވަނަ އަހަރުގެ ސެޕްޓެމްބަރު މަހުގެ 21 ވަނަ ދުވަހުއެވެ.
