ޓިކްޓޮކް ވީޑީއޯއެއް ހަދައިގެން 2،500 ރުފިޔާ ލިބޭ ޗެލެންޖެއް މިއަދު ފަށައިފި އެވެ.
އަންނަ ޖެނުއަރީ މަހުގެ 6 ވަނަ ދުވަހު އޮލިމްޕަސް ސިނަމާގައި އަޅުވަން ތައްޔާރުވަމުންދާ ފިލްމު "މީ އިޝްޤް" އިން ހުޅުވައިލި މި ޗެލެންޖުގައި އެ ފިލްމުގެ ކޮންމެވެސް އެއް ލަވައަކަށް ޓިކްޓޮކެއް ހެދުމަށްފަހު އަޕްލޯޑު ކުރަން ޖެހެ އެވެ.
އަޕްލޯޑު ކުރާއިރު ހޭޝްޓެގް މީ އިޝްޤް (#MeeIshq) އަދި ފިލްމުގެ ބަތަލާ އާޝާގެ ޓިކްޓޮކް ހޭންޑަލް (@chuweetaashaa2) ޓެގް ކުރަން ޖެހެ އެވެ. އަޕްލޯޑު ކުރާ ވީޑިއޯގައި ވަކި ދިގުމިނެއް ހުންނާކަށް ނުޖެހެ އެވެ. އެއްވަނަ ހޮވަނީ ޓިކްޓޮކްގައި އެންމެ ގިނަ ލައިކްސް ލިބޭ ވީޑިއޯއަށް ބަލައިފަ އެވެ. އެއްވަނައަށް ދާ ފަރާތަކަށް ފައިސާގެ އިނާމުގެ އިތުރުން "މީ އިޝްޤް" އަޅުވާ ފުރަތަމަ ރެއިން ދެ ޓިކެޓު ދޭން ވަނީ ނިންމައިފަ އެވެ. ފައިސާގެ އިނާމު ދޭނީ ޕްރިމިއާ އިވެންޓުގައި ސްޓޭޖު މަތިންނެވެ.
މި ޗެލެންޖުގެ ސުންގަޑިއަކީ އަންނަ ޖެނުއަރީ މަހުގެ 3 ވަނަ ދުވަހެވެ. މިހާރު "މީ އިޝްޤް" ފިލްމުގެ އެއް ލަވަ ވަނީ ރިލީޒް ކޮށްފަ އެވެ. ފިލްމުގެ ޑައިރެކްޓަރު އަޒްހާން އިބްރާހިމް ބުނީ އަންނަ ހޮނިހިރު ދުވަހު އިތުރު ލަވައެއް ރިލީޒް ކުރާނެ ކަމަށެވެ. އަދި އާ އަހަރު ފެށޭ ދުވަހު އެހެން ލަވައެއްވެސް ރިލީޒް ކުރާނެ ކަމަށެވެ.
އެހެންކަމުން ޓިކްޓޮކް ޗެލެންޖުގައި ވީޑިއޯ ހެދޭނީ ތިން ލަވައަށެވެ. އަންނަ ޖެނުއަރީ މަހުގެ 06 ވަނަ ދުވަހު އޮލިމްޕަސް ސިނަމާގައި އަޅުވަން ފަށާ މި ފިލްމުގެ މުހިންމު ރޯލުތަކުން އަހުމަދު ޝާރިފް، އާމިނަތު ރަޝީދާ، މުހައްމަދު ރަޝީދު، ފާތިމަތު ލަތީފާ، ފާތިމަތު ވިސާމާ، އަހުމަދު ޖިލިޔާން ރަޝީދުގެ އިތުރުން އަހުމަދު އަބާންވެސް ފެނިގެން ދެއެވެ. ދެ ގަޑިއިރާއި 25 މިނެޓުގެ މި ފިލްމުގެ ކިތައް ޝޯ އޮލިމްޕަސްގައި ދައްކާނެކަން އަދި އިއުލާނެއް ނުކުރެ އެވެ.
އެހެންނަމަވެސް ފިލްމުގެ ފުރަތަމަ 10 ޝޯގެ ޓިކެޓު މިހާރު ދަނީ ވިއްކަމުންނެވެ.
އިތުރު މައުލޫމާތު ހޯދުމަށާއި ޓިކެޓު ގަތުމަށް 9633326 އަށް ގުޅަން އަޒްހާން އެދެ އެވެ.
