ކުޅުދުއްފުށި ސިޓީން ފައިލޭރިއާ އަށް އިތުރު ހަ މީހުން ޕޮޒިޓިވްވެ އެ ރަށުގައި ބަލި ޖެހިފައި ތިބި މީހުންގެ އަދަދު 25 އަށް އަރައިފި އެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ކުރި ޓުވީޓެއްގައި ބުނެފައި ވަނީ މި އަހަރު ދުނިޔޭގެ އެއިޑްސް ދުވަސް ފާހަގަކުރުމަށް ކުޅުދުއްފުށީގައި ހިންގުނު ބިދޭސީ މަސައްކަތްތެރިންގެ ހެލްތު ސްކްރީނިންގް ކޭމްޕްގައި ބައިވެރިވި ބިދޭސީ މަސައްކަތްތެރިންގެ ތެރެއިން ފައިލޭރިއާއަށް މިހާތަނަށް 25 މީހަކު ޕޮޒިޓިވް ވެފައިވާ ކަމަށެވެ. ހެލްތު ސްކްރީނިން އެޗްޕީއޭއިން ހިންގާފައިވަނީ މިމަހުގެ 1އިން 19 އަށެވެ.
މިހާތަނަށް އެއްވެސް ދިވެއްސަަކު މި ބައްޔަށް ޕޮޒިޓިވްވެފައެއް ނުވެއެވެ.
ފައިލޭރިއާ އަކީ އާންމުކޮށް ކިއުލެކްސް މަދިރީގެ ޒަރީއާއިން ޖެހޭ ބައްޔެކެވެ. 2016 ވަނަ އަހަރު ރާއްޖެއިން އެ ބަލި ނައްތާލެވިފައިވާ ކަމުގެ ސެޓްފިކެޓް ވެސް ދުނިޔޭގެ ސިއްހަތު ޖަމިއްޔާ އިން ރާއްޖެއަށް ވަނީ ދީފަ އެވެ.
