މި ސަރުކާރަށް ފާޑުކިޔައި ލިޔުންތައް ޝާއިއުކުރި ވެބްސައިޓުތަކެއް ބްލޮކު ކުރުމުން މޯލްޑިވްސް މީޑިއާ ކައުންސިލުން ވެސް އެކަން ކުށްވެރިކޮށްފި އެވެ.
ރަޖިސްޓްރީނުކޮށް ހިންގަމުން އައި ކުރުސީ ޑޮޓް ކޮމް އާއި ދިޔަވަރު ޑޮޓް ކޮމާއި ރަޖިސްޓްރީކޮށްފައިވާ ފުރަތަމަ ޑޮޓް ކޮމް ދިވެހިރާއްޖެއިން ނުވަދެވޭ ގޮތަށް ވަނީ ބްލޮކްކޮށްފަ އެވެ.
އެކަމާ ގުޅިގެން މީޑިއާ ކައުންސިލުން ނެރުނު ބަޔާނުގައި ބުނެފައިވަނީ ރަޖިސްޓްރީ ނުކޮށް ހިންގާ ނޫސް މަޖައްލާތަކަކީ ވެސް 'މީޑިއާ' ކަމަށް އެ ކައުންސިލްގެ ގާނޫނުގެ 36 މާއްދާގައި ބަޔާންކުރާ ކަމަށެވެ. އެކައުންސިލުން ބުނީ ބްލޮކު ކޮށްފައިވާ ދެ ވެބްސައިޓުގެ ކޮންޓެންޓާ ގުޅޭ އެއްވެސް މައްސަލައެއް އެ ކައުންސިލަށް ހުށަހަޅާފައިނުވާއިރު އުސޫލެއް ނެތި ބްލޮކު ކުރުމަކީ ކަންބޮޑުވާ ކަމެއް ކަމަށެވެ. އަދި އެއީ ނޫސްވެރިކަމުގެ މިނިވަންކަމަށް އެޅުނު ހުރަހެއް އަދި ނުރައްކަލެއް ކަމަށް އެކައުންސިލުން ބުނެފައި ވެއެވެ.
އެ ބަޔާނުގައި ބުނީ، ރާއްޖޭގައި މިނިވަންކަމާ އެކު ފިކުރު ކުރުމާއި އިސްލާމްދީންގެ އަސްލަކާ ހިލާފު ނުވާ ގޮތުގެ މަތީން ދުލާއި ގަލަމުން ހިޔާލުފާޅު ކުރުމުގެ މިނިވަންކަމަކީ ގާނޫނު އަސާސީގެ 27 ވަނަ މާއްދާއިން ދިވެހި ރައްޔިތުންނަށް ކަށަވަރު ކޮށްދީފައިވާ އަސާސީ ހައްގެއް ކަމަށެވެ.
އަދި ތަހުޒީބީ މުޖުތަމުއުތަކުގައި ހަބަރާއި މައުލޫމާތު ފެތުރުމަށް، ނުވަތަ ހިޔާލުފާޅު ކުރުމަށް ވެބްސައިޓް ފަދަ ވަސީލަތްތައް ބޭނުން ކުރާ އިރު، އެއީ ކޮންމެހެން ރަޖިސްޓްރީ ކުރަން ޖެހޭ އެއްޗެއް ވެސް ނޫން ކަމަށެވެ. އަދި ދެހާހުގެ އަހަރުތަކުގެ ކުރީކޮޅުން ފެށިގެން ރާއްޖޭގައި ވެސް ރަޖިސްޓްރީ ނުކޮށް ނޫސްތައް އަންނަނީ ހިންގަމުންނެވެ. އެކަން ރަސްމީ ސިފައެއްގައި މަނާ ނުކުރާކަންވެސް އެ ޖަމްއިއްޔާގެ ބަޔާނުގައި ވަނީ ފާހަގަކޮށްފައެވެ.
މީގެ އިތުރަށް މޯލްޑިވްސް މީޑިއާ ކައުންސިލުގެ ގާނޫނުން "މީޑިއާ" ކަމަށް ބަލައިގެންފައިވާ ހަމަތަކުގެ ތެރޭގައި ވެސް ރަޖިސްޓްރީ ނުކޮށް ހިންގާ ނޫސް މަޖައްލާތަކީ ވެސް ހަބަރާއި މައުލޫމާތު ފެތުރުމަށް މީޑިއާ ކަމަށް ވަނީ ބަލައިގެންފައި ކަމަށް ބުނެފައި ވެއެވެ.
އެހެންކަމުން މީޑިއާ ކައުންސިލްގެ ދައުރެއް ނެތި އެ 2 ވެބްސައިޓް ބަންދު ކުރަން ޖެހުނު ސަބަބު ހާމަ ކުރުމަށާއި ހާމަ ނުކުރާހާ ހިނދަކު އެ 2 ސައިޓް އަލުން އޮޕަރޭޓް ކުރުމަށް ދޫކޮށްލުމަށް ވެސް ބަޔާނުގައި ވަީ ގޮވާލާފައެވެ.
އެ ޖަމިއްޔާއިން ގަބޫލު ކުރާ ގޮތުގައި، ހަބަރާއި މައުލޫމާތު ފަތުރާ ފަރާތްތަކަކީ، ރަޖިސްޓްރީ ކޮށްގެން ވިޔަސް، އަދި ރަޖިސްޓްރީ ނުކޮށް ކަމަށް ވިޔަސް، ތެދު މައުލޫމާތު ދޭ ބަޔަކަށްވާން ޖެހޭނެ އެވެ. ސާބިތު ނުހިފޭ ވާހަކަތައް ހިމަނައިގެން މީހުންގެ އަބުރު ކަތިލުމާއި ހަގީގަތް އޮޅުވާލުމަށް ދޮގު މައުލޫމާތު ފަތުރައިގެންވެސް ނުވާނެ އެވެ.
އަދި ހަމަ އެއާ އެކު އެ ތެދެ މައުލޫމާތު ފެތުރުމަށް ބާރު ދިނުމުގެ ގޮތުން ދައުލަތުގެ އިދާރާތަކުން މީޑިއާތަކަށް، އަދި ފަރުދުންނަށް ވިޔަސް، މައުލޫމާތު ފޯރުކޮށްދިނުމަށް ހުރަސްއަޅައިގެން ވެސް ނުވާނެ ކަމަށް ބަޔާނުގައި ވަނީ ބުނެފައެވެ.
އަދި މީޑިއާއަށް ހުޅުވާލާފއިވާ ދޮރަކީ ތައްމިނަށް ހުޅުވާލެވިފައި އޮންނަ ދޮރަކަށް ވާން ޖެހޭނެ ކަމަށް ވެސް ބަޔާނުގައި ވަނީ ބުނެފައެވެ. ތެދު މައުލޫމާތު، ތެދަށް ފޯރުކޮށްދޭ ފަރާތްތަކަށް އެކަން ރަނގަޅު ގޮތުގައި ނުކުރެވޭނެ ކަމަށް މީޑިއާ ކައުންސިލްގެ ބަޔާނުގައި ވަނީ ބުނެފައެވެ.
