ސަރުކާރުގެ ބައެއް ވަޒީރުންނަށް ރުހުން ނުދިނުމަށް ސަރުކާރު ކޯލިޝަން ކަމަށްވާ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އާއި ޕީޕަލްސް ނެޝަނަލް ކޮންގްރެސް (ޕީއެންސީ) އިން އެދެމުންދާ ކަމަށް އެމްޑީޕީގެ ޗެއާޕާސަންގެ ނައިބު އިދާރީ، އިބްރާހީމް ވަހީދު (އިބުރޭ) ވިދާޅުވެއްޖެ އެވެ.
އިބްރާހިމް ވަހީދު ވިދާޅުވީ ޕީޕީއެމް/ޕީއެންސީން އެގޮތަށް އެދުނީ އެ ކޯލިޝަންގެ ލީޑާޝިޕުގެ ބައެއް ބޭފުޅުންރައީސް ޑރ. މުހައްމަދު މުއިއްޒުގެ ސަރުކާރުގެ ވަޒީރުކަމަށް އައުމަށް ބޭނުންވާތީކަމަށެވެ. އެހެން އެގޮތަށް އެދުނު ކަމުގައި ވިއަސް ރުހުން ދިނުމާއި ނުދިނުން ނިންމާނީ އެމްޑީޕީގެ ޕާލަމެންޓަރީ ގްރޫޕުން ކަމަށް އޭނާ ވިދާޅުވި އެވެ.
ޕީޕީއެމް އަދި ޕީއެންސީގެ އިސް ބައެއްބޭފުޅުން ވަޒީރުކަމަށް ކުރާ އުއްމީދު ފުރިހަމަ ކުރުމަށް މުއިޒު ސަރުކާރުގެ ބައެއްވަޒީރުންނަށް އެމްޑީޕީން ރުހުން ނުދިނުމަށް އެބަ އެދޭ، ރުހުންދޭނެ ވަޒީރުންނާ ނުދޭނެ ވަޒީރުން ނިންމާނީ އެމްޑީޕީގެ ޕީޖީ ގްރޫޕުން
އިބްރާހިމް ވަހީދު އެކްސްގައި ވިދާޅުވެފައި ވެއެވެ.
ރައީސް ޑރ. މުހައްމަދު މުއިއްޒުގެ ކެބިނެޓުގައި 22 މިނިސްޓަރުން ތިއްބަވަ އެވެ. އެ ބޭފުޅުންނަށް ރުހުން ދިނުމަށް މީގެ ކުރިން ކޮމިޓީއިން ފާސްކޮށް މަޖިލީހުގެ ތަޅުމަށް ހުށަހެޅި އެވެ. ނަމަވެސް ތަޅުމުން އަނބުރާ ކޮމިޓީއަށް ފޮނުވާލާފައި ވަނީ ވަޒީރުންނަށް ރުހުން ދެވޭނީ، މިނިސްޓްރީތަކުގެ މެންޑޭޓު ބަލައި ކޮމިޓީން އަލުން މައްސަލަ ދިރާސާކޮށް ނިންމި ގޮތުގެ ރިޕޯޓު މަޖިލިސް ތަޅުމަށް ފޮނުވުމުން ކަމަށް ބުނެ އެވެ.
ސަރުކާރުގެ ބައެއް ވަޒީރުންނަށް ރުހުން ނުދިނުމަށް ސަރުކާރު ކޯލިޝަނުން އެދެމުންދާ ކަމަށް އިބްރާހިމް ވަހީދު ވިދާޅުވެފައިވާއިރު ހަމައެމްވީއަށް އެނގިފައިވާ ގޮތުގައި ރުހުން ނުދިނުމަށް އެމްޑީޕީ މަޖިލީސް މެމްބަރުންގެ ކިބައިން ޕީޕީއެމް/ޕީއެންސީގެ އިސް ބޭފުޅުންތައް އެދެމުންދަނީ ޓޫރިޒަމް މިނިސްޓަރު އިބްރާހީމް ފައިސަލާއި، ފިނޭންސް މިނިސްޓަރ ޑރ. މުހައްމަދު ޝަފީގަށް ރުހުން ނުދިނުމަށެވެ.މީގެ އިތުރުން ހައުސިން މިނިސްޓަރު ޑރ. އަލީ ހައިދަރު އަހުމަދަށް ވެސް ރުހުން ނުދިނުމަށް އެމްޑީޕީގެ މެމްބަރުންގެ ކިބައިން އެދެމުންދާކަން ވަނީ އެނގިފަ އެވެ.
މަޖިލީހުގެ މިހިނގާ ދައުރު ނިމޭނީ މިމަހުގެ 28 ވަނަ ދުވަހު އެވެ. ބެލެވޭ ގޮތުގައި މަޖިލިސްގެ މިދައުރު ނިމުގެ ކުރިން ވަޒީރުންނަށް ރުހުން ދިނުމާމެދު ގޮތެއް ނިންމާނެ އެވެ.
