ލޯކަލް ގަވަނަންސް މިނިސްޓަރު އާދަމް ޝަރީފް އުމަރަށް ރުހުން ދޭންޖެހޭ ސަބަބެއް ފެނިވަޑައިނުގަންނަވާކަމަށް ކުރީގެ އިކޮނޮމިކް މިނިސްޓަރު، އަދި އިދިކޮޅު އެމްޑީޕީގެ ޗެއާޕާސަން ފައްޔާޒް އިސްމާއީލް ވިދާޅުވެއްޖެ އެވެ.
ފައްޔާޒު ވިދާޅުވީ އާދަމް ޝަރީފު ޑިފެންސް މިނިސްޓަރަކަށް ހުންނެވި އިރު ވެސް މަޖިލީހަށް ސިފައިން ވައްދާ މަޖިލިސް މެމްބަރުންނަށް އަނިޔާ ކުރެއްވި ކަމަށާއި މިހާރު ލޯކަލް ގަވަނަންސް މިނިސްޓްރީގެ ދަށުގައިވާ މޯލްޑިވްސް ކޮމިއުނިކޭޝަންސް އޮތޯރިޓީ (ކޭމް) މެދުވެރިކޮށް ހިޔާލުފާޅުކުރުމުގެ މިނިވަންކަން ނައްތާލުމަށް މަސައްކަތް ފެއްޓެވީ ކަމަށެވެ. ފުށިދިއްގަރު ފަޅުގައި 'ރަސްމާލެ' ތަރައްގީކުރުމުގެ މަޝްރޫއަކީ ވެސް ލާމަރުކަޒުކުރުމުގެ ސިޔާސަތާ މުޅިން ޚިލާފު މަޝްރޫއެއްގެ ގޮތުގައި ވިދާޅުވި އެވެ. އެހެންކަމުން މިނިސްޓަރ އާދަމް ޝަރީފަށް ރުހުން ދޭންޖެހޭ އެއްވެސް ސަބަބެއް ފެނިވަޑައިނުގަންނަވާ ކަމަށް ވިދާޅުވި އެވެ. މިވަގުތު މަޖިލީހުގެ މެޖޯރިޓީ އޮތީ އެމްޑީޕީގަ އެވެ.
ޑިފެންސްގަ ހުއްނެވިއިރު މަޖްލީހުގެ ތާރީހުގަ އަލަށްސިފައިން ވައްދާ މެމްބަރުންނަށް އަނިޔާކުރެއްވި. މިހާރު ކޭމް މެދުވެރިކޮށް ހިޔާލުފާޅުކުރުމުގެ މިނިވަންކަން ނައްތާލުމަށް މަސައްކަތް ފެއްޓެވީ. ލާމަރުކަޒީނިޒާމްވެސްފުށިދިއްގަރަށް، ރުހުން ދޭންޖެހޭ އެއްވެސް ސަބަބެއް ނުފެނޭ.
ސަރުކާރަށް ފާޑުކިޔުން އަމާޒުކުރާ ވެބްސައިޓްތަކެއް ކޭމް މެދުވެރިކޮށް ސަރުކާރުން ވަނީ ބްލޮކް ކޮށްލާފަ އެވެ. އޭގެތެރޭގައި ރަޖިސްޓްރީކޮށްގެން ހިންގާ ނޫސް ވެބްސައިޓެއް ވެސް ހިމެނެ އެވެ. އެކަމާއިގުޅިގެން ސަރުކާރަށް ވަނީ ފާޑުކިޔުން އަމާޒުވެފަ އެވެ. ނޫސްވެރިކަމުގެ އަހްލާގީ މިންގަނޑު ހިފެހެއްޓުމާއި ދޮގު މައުލޫމާތު ފެތުރުން ހުއްޓުވަން ފިޔަވަޅު އެޅުމަކީ މޯލްޑިވްސް މީޑއާ ކައުންސިލުގެ މެންޑޭޓުގައި ހިމެނޭ ކަމެކެވެ. އެކަމަކު އެ ކައުންސިލަށް އެ ދެ ވެބްސައިޓުގެ ކޮންޓެންޓާ ގުޅޭ އެފަދަ ޝަކުވާއެއް ނުލިބޭ ކަމަށް އެ ކައުންސިލުން ބުނެ އެވެ.
ރައީސް ޑރ. މުހައްމަދު މުއިއްޒުގެ ކެބިނެޓުގެ މިނިސްޓަރުންނަށް ރުހުން ދިނުނުން އަދި އޮތީ ކޮމިޓީ މަރުހަލާގަ އެވެ. ޕީޕީއެމް އަދި ޕީއެންސީގެ އިސް ބައެއްބޭފުޅުން ރައީސް މުއިއްޒު ސަރުކާރުގައި ހިމެނިވަޑައިގަންނަވާ ބައެއްވަޒީރުންނަށް އެމްޑީޕީން ރުހުން ނުދިނުމަށް އެދެމުން ގެންދާކަމަށް މްޑީޕީގެ ޗެއާޕާސަންގެ ނައިބު އިދާރީ، އިބްރާހީމް ވަހީދު (އިބުރޭ) ވެސް ވަނީ ވިދާޅުވެފަ އެވެ. އޭނާ ވިދާޅުވެފައިވަނީ އެގޮތަށް އެދުނު ނަމަވެސް ރުހުން ދިނުމާއި ނުދިނުން ނިންމާނީ އެމްޑީޕީގެ ޕާލަމެންޓަރީ ގްރޫޕުން ކަމަށެވެ.
