މިމަހުގެ 27 ވަނަ ދުވަހު ބާއްވާ ރައްޔިތުންގެ މަޖިލީޙުގެ ޕީޕީއެމް/ޕީއެންސީ ޕްރައިމަރީއަށް ވާދަކުރާ މުހައްމަދު އިބްރާހިމް(މުހައްމަދުބެ) އަށް ކޮމަންޑޫ ދާއިރާގެ ބޮޑު ތާއީދެއް އޮތްކަމަށް އޭނާ ބުނެފި އެވެ.
މުހައްމަދުބެ ބުނީ އޭނާ ކޮމަންޑޫ ދާއިރާގެ ތިން ރަށުން ވެސް ބޮޑު ތާއީދު އެބައޮތްކަމަށާއި އެރަށްރަށުގެ މެޖޯރިޓީ ނަގާނެ ކަމަށެވެ.
"އިރާދަ ކުރެއްވިއްޔާ އަޅުގަނޑު މި ޕްރައިމަރީ ނަގާނަން." މުހައްމަދުބެ ބުންޏެވެ.
ޕީޕީއެމް/ޕީއެންސީ ކޮމަންޑޫ ދާއިރާގެ މަޖިލިސް ޕްރައިމަރީގައި ވާދަކުރަނީ މުހައްމަދުބެގެ އިތުރުން އިބްރާހީމް ވަޙީދު (ވައްޑެ) އެވެ.
"އަޅުގަނޑަކީ އަބަދުވެސް މި ތިންރަށުގެ މީހުންނާއި ކައިރިން މަސައްކަތް ކުރަމުން އައި މީހެއް. މިދާއިރާގެ ޕީޕީއެމް/ޕީއެންސީގައި ހިމެނޭ ހުރިހާ ބޭފުޅުންވެސް އަޅުގަނޑަށް ވޯޓު ދެއްވުމަކީ އަޅުގަނޑުގެ ވަރަށް ބޮޑު އެދުމެއް" މުހައްމަދުބެ ބުންޏެވެ.
މުހައްމަދުބެގެ ކެންޕެއިންގެ ތެރެއިން
މުހައްމަދުބެގެ ކެންޕެއިންގެ ތެރެއިން
މުހައްމަދުބެގެ ކެންޕެއިން ޓީމުގައި އިސްކޮށް ހަރަކާތްތެރިވާ މީހަކ ބުނީ 2008 ވަނަ އަހަރުން ފެށިގެން މުހައްމަދުބެ އަކީ ޕީޕީއެމަށް އިޚްލާސްތެރި މީހެއްކަމަށެވެ. ކޮމަންޑޫ ދާއިރާގެ ޕީޕީއެމް ނަގަހައްޓަން މިހާތަނަށް ކުރި މަސައްކަތްތައް އެއްވެސް ވަރުބަލިކަމެއް ނެތި "ޓީމް" ގޮވައިގެން އުޅުނީ މުހައްމަދުބެ ކަމަށެވެ.
" މިދިޔަ ރިޔާސީ އިންތިޚާބުތަކުގަޔާ މަޖިލިސް އިންތިޚާބުތަކުގައި ވެސް މުހައްމަދުބެ ހުންނެވީ ޓީމްގެ ފަހަތުގައި ލަފާއެރުވުމުގައި. ތިންރަށުގައި އަޅުގަނޑުމެން މިކުރާ ކެންޕެއިންގައި މުހައްމަދުބެގެ ތާއީދު އޮތްވަރު އެނގި ހާމަވޭ." އޭނާ ބުންޏެވެ.
އޭނާ ބުނީ ކޮމަންޑޫ ދާއިރާގެ ތިންރަށުގެ ޕީޕީއެމް/ޕީއެންސީގެ ސްޓިއަރިންގ ކޮމިޓީގެ އިއްތިފާގުން ވެސް ނިންމާފައިވަނީ މުހައްމަދުބެ އަށް ތާއީދު ކުރުމަށް ކަމަށެވެ.
ކޮމަންޑޫ ދާއިރާގައި ހިމެނެނީ ކޮމަންޑޫގެ އިތުރުން ފޯކައިދޫ އަދި މަރޮށި އެވެ. މަޖިލިސް އިންތިޚާބު އަންނަ ރަމަޟާން މަހުގެ 7 ވަނަ ދުވަހު ބާއްވަން ނިންމާފައިވާއިރު އިދިކޮޅު އެމްޑީޕީގެ ޕްރައިމަރީ ބާއްވަން ހަމަޖައްސާފައިވަނީ ފެބްރުއަރީ މަހުގެ ތިންވަނަ ދުވަހު އެވެ. ކޮމަންޑޫ ދާއިރާ އެމްޑީޕީގެ ޕްރައިމަރީގައި ވެސް ދެ މީހަކު ވާދަކުރެ އެވެ.
