މާލެއިން ޕޮޒިޓިވްވާ މީހުންގެ އަދަދު ބޮޑުތަނުން ދަށަށް

މާލެއިން ކޮވިޑް-19 އަށް ޕޮޒިޓިވްވާ މީހުންގެ އަދަދު ދަށަށް ދާން ފަށައިފި އެވެ.
އެގޮތުން އިއްޔެ މާލެ ސަރަހައްދުން ޕޮޒިޓިވްވީ 88 މީހުންނެވެ. މިއީ ވޭތުވެދިޔަ ހަފާތްގައި 300 އިން މަތީގައި މިއަދަދު ހުރުމަށްފަހު މިހާ ބޮޑަށް ދަށަށް ފިޔަ ފުރަތަމަ ދުވަހެވެ.
އިއްޔެ މުޅި ރާއްޖެއިން ކޮވިޑަށް ޕޮޒިޓިވްވީ 246 މީހުންނެވެ. ގިނައީ އަތޮޅުތެރެއިން ޕޮޒިޓިވްވި މީހުންނެވެ. އެގޮތުން 137 މީހަކު އަތޮޅުތެރެއިން ޕޮޒިޓިވްވި އިރު، ރިޒޯޓުތަކުން 13 މީހަކު ޕޮޒިޓިވްވި އެވެ. އަދި ތަރައްގީ ކުރަމުންދާ ރަށްތަކުންވެސް 8 މީހަކު ޕޮޒިޓިވްވި އެވެ.
މިހާރު ރާއްޖޭގައި އެކްޓިވް ކޭސްތަކުގެ އަދަދު އުޅެނީ 11،041 ގަ އެވެ. އަދި ޖުމްލަ ކޮވިޑަށް ޕޮޒިޓިވްވި މީހުންގެ އަދަދު އުޅެނީ 70،077 ގަ އެވެ.
ކޮވިޑް ޖެހިގެން ހޮސްޕިޓަލުތަކުގައި ފަރުވާ ދޭ މީހުންގެ އަދަދުވެސް ވަނީ ވަރަށް ބޮޑަށް ދަށަށް ގޮސްފަ އެވެ. އެގޮތުން އިއްޔެއާއި ހަމައަށް ހޮސްޕިޓަލުގައި އެޑްމިޓުކޮށްފައި ތިބީ 97 މީހެކެވެ.
މިހާތަނަށް އައިއިރު މި ބަލީގައި ރާއްޖެއިން ވަނީ 195 މީހަކު މަރުވެފަ އެވެ.