ހަމަލާގެ ސަބަބުން ވާއަތުގައި ރެނދުލާފައިވާ ކަމަށާއި އެނބުރި ވަޑައިގެން މަސައްކަތުގައި ދެން ފެނިގެންދާނީ ކުރިއަށްވުރެ މާ ގަދަކޮށް ކަމަށް ބަޔަކު ދިން ހަމަލާއެއްގައި ޒަހަމްވި، ޕްރޮސެކިއުޓަރ ޖެނެރަލް، ހުސައިން ޝަމީމް ވިދާޅުވެއްޖެއެވެ.
ސައިކަލެއްގައި އައި ދެ މީހަކު މިއަދު ހެނދުނު ވަނީ ޝަމީމަށް ހަމަލާދީ، އަތް ޒަޚަމުކޮށްލައިފައެވެ. ހަމަލާއަށް ފަހު، ސިފައިން މިހާރު ވަނީ އޭނާގެ ސެކިއުރިޓީ ވެސް ވަރުގަދަކޮށްފައެވެ.
ހަމަލާގައި ލިބުނު ޒަހަމްތަކަށް އޭޑީކޭ ހޮސްޕިޓަލުން ފަރުވާ ހޯއްދެވުމަށްފަހު، އަތުގައި ބޭސް އަޅުއްވައިގެން ހުންނެވި ފޮޓޯ މީސްމީޑިއާގައި އާންމު ކުރައްވަމުން ޝަމީމް ވިދާޅުވީ، އެންމެންގެ ފަރާތުން ލިބުނު ލޯތްބާއި ހެޔޮ އެދުންތަކަށް ޝުކުރު އަދާ ކުރާ ކަމަށެވެ.
އަދި ކުރިއަށް އޮތްތާ މަސައްކަތުގެ ދާއިރާއިންނާއި ދުވުން އަދި ފެތުމުގައި ފެނިގެންދާނީ ކުރިއަށްވުރެ ގަދަކޮށް ކަމަށް ޝަމީމް ވިދާޅުވިއެވެ.
"މިއަދު ހެނދުނު އަޅުގަނޑަށް ވަނީ ހަމަލާދީފަ. ވައަތުގައި ވަނީ ރެނދެއް ލާފަ. މިހާރު މިހުރީ ގޭގައި އާއިލާއާއި އެކީ. މަސައްކަތާއި ދުވުމާއި ބައިސިކަލް ދުއްވުމުގެ އިތުރުން ފެތުމަށް ދެން އެނބުރި އަންނަނީ މާ ގަދަކޮށް" ޝަހީމް ވިދާޅުވިއެވެ.
ޝަމީމަށް ދިން ހަމަލާ ގިނަ ޕާޓީތަކުންނާއި ސިޔާސީ ލީޑަރުން ކުށްވެރިކޮށްފައިވާއިރު، ފުލުހުން އަންނަނީ މިމައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރަމުންނެވެ. އަދި މިމައްސަލަ މިހާރު ވަނީ މަޖިލީހުގެ 241 ކޮމިޓީއަށް ވެސް ހުށަހަޅާފައެވެ.
