އެމްޑީޕީއާއި ދަ ޑިމޮކްރެޓްސްގެ ޓިކެޓުގައި މަޖިލިސް އިންތިޚާބުގައި ވާދަކުރާ ކެންޑިޑޭޓުން ހޮވުމަށް ބާއްވާ ޕްރައިމަރީ މާދަމާ ބާއްވަން ތައްޔާރުވެއްޖެއެވެ.
ދެ ޕާޓީގެ ޕްރައިމަރީ ވޯޓުލުން ވެސް ފެށުމަށް ހަމަޖެހިފައިވަނީ މާދަމާ ހެނދުނު 9:00ގައެވެ.
އެމްޑީޕީގެ ޕްރައިމަރީގައި 40 ދާއިރާއަކަށް 149 ކެންޑިޑޭޓަކު ވާދަކުރެއެވެ.
މި ޕްރައިމަރީގައި ޖުމްލަ 25،325 މީހަކަށް ވޯޓުލުމުގެ ހައްގު ލިބިފައިވާ ކަމަށް އެމްޑީޕީން ބުނެއެވެ. އަދި 95 ރަށެއްގައި ވޯޓު ފޮށިތައް ބަހައްޓާއިރު މާލެ ސަރަހައްދުގައި 27 ވޯޓު ފޮށި ބެހެއްޓުމަށް އެ ޕާޓީން ވަނީ ނިންމާފައެވެ.
މާލޭގައި ވޯޓުފޮށި ބަހައްޓަނީ މަޖީދިއްޔާ ސްކޫލާއި ޖަމާލުއްދީން ސްކޫލުގައެވެ. އަދި ހުޅުމާލޭގެ ކާމިލް ދީދީ ޕްރީ ސްކޫލާއި މުޙައްމަދު ޤާސިމް ޕްރީސްކޫލުގައި ހުޅުމާލެ ދާއިރާތަކުގެ ވޯޓު ފޮށި ބެހެއްޓުމަށް އެމްޑީޕީން ވަނީ ނިންމާފައެވެ.
އެމްޑީޕީން ވަނީ ޕްރައިމަރީއަކާ ނުލައި 49 ދާއިރާއެއްގެ ޓިކެޓު ހަވާލުކޮށްފައެވެ. ޕްރައިމަރީއަކާ ނުލައި ޓިކެޓް ދީފައިވަނީ އެ ޕާޓީން ހުޅުވާލި ފުރުސަތުގައި އެންމެ ކެންޑިޑޭޓަކު ކުރިމަތިލާފައިވާ ދާއިރާތަކަށެވެ.
ދަ ޑިމޮކްރެޓްސް އިން ޕްރައިމަރީ ބާއްވަން ނިންމާފައިވަނީ ދެ ދާއިރާއެއްގެއެވެ. އެއީ ހުޅުމާލެ ދެކުނު ދާއިރާ އާއި ހެންވޭރު ދެކުނު ދާއިރާގެއެވެ.
މިހާރު ކުރިއަށްދާ މަޖިލީހުގައި އެ ދެ ޕާޓީން އެއްކޮށް މަސައްކަތް ކުރަން އެއްބަސްވެފައިވާކަން މިދިޔަ ހަފުތާގައި އިއުލާން ކުރި ނަމަވެސް، މަޖިލިސް އިންތިޚާބުގައި ވާދަކުރާނީ ވަކިން ކަމަށް ދެ ޕާޓީން ވަނީ ބުނެފައެވެ.
މިއަހަރުގެ މަޖިލިސް އިންތިޚާބު ބާއްވާނީ އަންނަ މާޗު މަހުގެ 17ގައެވެ.
