އިލެކްޝަންސް ކޮމިޝަނުން ބުނީ، ރަށްވެހިވެފައިވާ ރަށް ނޫން އެހެން ތަނެއްގައި ވޯޓުލުމަށް ރީ-ރަޖިސްޓަރީ ކުރުމުގެ ފުރުސަތު ވީހާވެސް ގިނަ ރައްޔިތުންނަށް ދިނުމުގެ ގޮތުންނާއި، ރައްޔިތުންގެ އިންތިހާބަށް އާންމުން ހޭލުންތެރިކުރުމުގެ މަގުސަދުގައި، ކުޑަކުދިންގެ ހަވީރާއެކު، ރޯޑު އިވެންޓެއް މި ހަފްތާ ބަންދުގައި ބޭއްވުމަށް ހަމަޖެހިފައިވާ ކަމަށެވެ.
މި އިވެންޓް ބޭއްވުމަށް ހަމަޖެހިފައިވާ ގޮތަށް ބަލާއިރު، މިއަދު މާލޭގެ އާޓިފިޝަލް ބީޗުގައި ހަވީރު 4:00 އިން އިރުއޮއްސި 6:00 އަށް އިވެންޓް ކުރިއަށްދާއިރު، ހޮނިހިރު ދުވަހުގެ ހަވީރު 4:00 އިން ހަވީރު 6:00 އަށް ހުޅުމާލެ ފޭސް 2، ގެ (ހިޔާ ޓަވަރު 07 އާއި ހިޔާ ޓަވަރު 11 އާއި ދެމެދު އޮންނަ (ހިޔާ ޕާރކް ގްރައުންޑް ސަރަހައްދު)ގައިވެސް އިވެންޓް ކުރިއަށް ދާނެ އެވެ.
ކުރިއަށް އޮތް މަޖިލިސް އިންތިޚާބުގައި ކަރުދާސް ފޯމު ބަލައިނުގަނެ، ރީރަޖިސްޓްރޭޝަން އޮންލައިންކޮށް ފުރިހަމަ ކުރާ ގޮތަށް އީސީން ވަނީ ނިންމައިފައެވެ. އެގޮތުން ކުރިން ރިޔާސީ އިންތިޚާބުގައި ބޭނުންކުރި ނިޒާމުގެ އިތުރުން އީފާސް ބޭނުންކޮށްގެން ރީރެޖިސްޓާ ކުރެވޭނެ ނިޒާމު ވެސް އެ ކޮމިޝަނުން ވަނީ ހަމަޖައްސައިފައެވެ.
މިއަހަރުގެ މަޖިލިސް އިންތިޚާބު ބޭއްވުމަށް އީސީން ނިންމަވާފައިވަނީ މާޗު މަހުގެ 17 ވަނަ ދުވަހުއެވެ.
