އިދިކޮޅު މައި ޕާޓީ، އެމްޑީޕީ އާއި ދަ ޑިމޮކްރެޓްސްގެ މަޖިލިސް އިންތިހާބުގެ ޕްރައިމަރީގެ ވޯޓުލުން ފަށައިފިއެވެ.
އެމްޑީޕީގެ އެތެރޭގައި ޕްރައިމަރީ ބާއްވަނީ ބާއްވަނީ 40 ދާއިރާއަކަށެވެ. އެ 40 ދާއިރާއަށް 149 ކެންޑިޑޭޓުން ވާދަކުރާއިރު، 25،325 މީހަކަށް ވޯޓު ލުމުގެ ހައްގު ލިބެ އެވެ. މި ޕްރައިމަރީއަށް 95 ރަށެއްގައި ވޯޓު ފޮށި ބަހައްޓާއިރު މާލެ ސަރަހައްދުގައި 27 ފޮއްޓެއް ބަހައްޓަ އެވެ.
އެމްޑީޕީގެ ޓިކެޓްގައި ވާދަކުރަން އެއްވެސް ފަރާތަކުން ކުރިމަތިނުލާ 7 ދާއިރާއެއް އެބައޮތެވެ. އެމްޑީޕީންވަނީ ޕްރިމަރީއަކާނުލާ 46 ދާއިރާއަކުން ޓިކެޓު ދީފައިވެ އެވެ.
ވިހިވަނަ ރައްޔިތުންގެ މަޖިލީހަށް 93 ދާއިރާއަށް މެންބަރުން އިންތިހާބު ކުރާނެ އެވެ. އޭގެ ތެރެއިން އެމްޑީޕީން ޕްރައިމަރީ ބާއްވަނީ 40 ދާއިރާއަކަށެވެ.
ޑިމޮކްރެޓްސްގެ ޕްރައިމަރީ ބާއްވަނީ އެންމެ ދެ ދާއިރާގައެވެ. އެއީ ހުޅުމާލެ ދެކުނު ދާއިރާ އަދި ހެންވޭރު ދެކުނު ދާއިރާގައެވެ. ހުޅުމާލެ ދެކުނު ދާއިރާގެ ވޯޓު ފޮށި ބްރައިޓްވޭ އިންޓަނޭޝަނަލް ސްކޫލްގައި ބެހެއްޓި އިރު، ހެންވޭރު ދެކުނު ދާއިރާގެ ވޯޓު ފޮށި ބަހައްޓާފައި ވަނީ އެ ޕާޓީގެ ހަރުގޭގައެވެ.
މަޖިލިހުގެ އިންތިހާބުގައި 93 ދާއިރާ އަށް ވާދަކުރަން ޑިމޮކްރެޓްސް އިން ނިންމި ނަމަވެސް ކެންޑިޑޭޓުން ކުރިމަތިލީ 41 ދާއިރާއަށެވެ. އޭގެ ތެރެއިން 39 ދާއިރާއަކަށް އެއް ކެންޑިޑޭޓުން ކުރިމަތިލާފައިވާތީ އެ ކެންޑިޑޭޓުންނަށް ޕްރައިމަރީއަކާ ނުލައި ޓިކެޓު ވަނީ ކަށަވަރުވެފައެވެ.
