އިސްލާމީ ކަންތައްތަކާއި ބެހޭ ވަޒީރު ޑރ މުހައްމަދު ޝަހީމް އަލީ ސައީދު ވިދާޅުވީ ސައޫދީގައި ކިޔަވަން ތިބޭ ދިވެހި ދަރިވަރުން ޙައްޖު މޫސުމުގައި ހާޖީންނަށް އެހީތެރިވުމަށް ހައްޖުގައި ބައިވެރިވުމުގެ ފުރުޞަތު ދިނުމަށް ދިވެހި ސަރުކާރުން ހުށައެޅުއްވިކަމަށެވެ. އަދި އެ ހުށައެޅުން ސައުދީ ހައްޖު ވުޒާރާއިން އެއްބަސްވެ، އެކަން ހަމަޖެހިފައިވާކަން ރަސްމީކޮށް މިއަދު އަންގާފައިވާކަމަށްވެސް ވަޒީރު ވިދާޅުވިއެވެ.
މިއަހަރު ހައްޖަށް ލިބޭ ރަސްމީ ކޯޓާގެ 1000 ޖާގަ ދީފައިވަނީ ހައްޖު ކޯޕަރޭޝަނަށެވެ. ދައުލަތުން ހިލޭ ހައްޖަށް ފޮނުވާ 50 މީހުންވެސް މިއަހަރުގެ ހައްޖުގައި ބައިވެރިވާނެއެވެ.
ހައްޖުވެރިންނަށް ފަސޭހަ ކުރުމަށް މައްކާ މަދީނާއަށް ކުރާ ދަތުރުތައް ބަހުގައި ކުރުމުގެ ބަދަކުގައި ހަރަމެއިން ސްޕީޑު ރޭލުގައި ކުރުމަށް ހައްޖު ކޯޕަރޭޝަނުން ވަނީ ނިންމާފައެވެ. އެ ބަދަކާއި އެކު 6 ގަޑިއިރުގެ ދަތުރު 2 ގަޑިއިރަށް ބަދަލުވާނެއެވެ.
