ނެތިމޮށުމާއި މީހުންގެ އަބުރާ ބެހުމުގައި ވަގުތުތައް ހޭދަކުރާ މީހުން އެފަދަ ފާފަތަކުން ދުރުހެލިވުމަށް ޢަޒުމު ކަނޑައެޅުމަށް ހުކުރު ޚުޠުބާގައި ގޮވާލައިފިއެވެ. މިއަދުގެ ހުކުރު ޚުޠުބާ ޚާއްޞަކޮށްފަވަނީ އިސްރާއާއި މިޢުރާޖުގެ ޒިކުރާގެ ތެރެއިން މި މަޢުޟޫއަށެވެ.
ހުކުރު ހުތުބާގައި ފާހަގަކޮށްފައިވާ ގޮތުގައި އިސްރާއާއި މިޢުރާޖުގެ މަތިވެރި ޙާދިޘާއަކީ މާތް الله ކީރިތި ރަސޫލާ محمد رسول اللهއަށް ދެއްކެވި މުޢުޖިޒާތެކެވެ. އަދި މުސްލިމުންނަށް ކުރިމަތި ކުރެއްވި ބޮޑު އިމްތިޙާނެއް ކަމަށާއި އިސްރާގެ ޙާދިޘާއަކީ ހިނގާފައިވާ ކަމެއްކަން ކީރިތި ޤުރްއާނުގެ ނައްސުން ސާބިތުވާ ކަމަށެވެ.
ހުތުބާގައި ބުނީ އިސްރާއާއި މިޢުރާޖުގެ ދަތުރުފުޅުގައި ބައެއް މީހުންކުރާ ކުށްފާފަތަކަށް މާތް ﷲ ކަނޑައަޅުއްވާފައިވާ ޢަޛާބުގެ މަންޒަރުތަކެއް ކީރިތި ރަސޫލާއަށް ދެއްކެވި ކަމަށެވެ.
އޭގެ ތެރެއިން އެއް ބަޔަކީ އެބައިމީހުންގެ އިނގިލިތަކުގައި، ލޮއިގެ ނިޔަފަތިތަކެއް ހުރި ބަޔަކު އެ ނިޔަފަތިތަކުން އެމީހުންގެ މެއާއި މޫނުގައި ވަކި އަޅައި ނޮޅަމުންދާ ބައެއްކަމަށެވެ. އެއީ ކޮން ބައެއްތޯ ސުވާލު ކުރެއްވުމުން ޖިބްރީލުގެފާނު ވިދާޅުވީ އެއީ މީސްތަކުންގެ އަބުރަށް އަރައި ނެތި މޮށޭ މީހުން ކަމުގައެވެ.އަލިފާނުގެ ކަތުރުތަކަކުން އެބައިމީހުންގެ ތުންފަތްތައް ކޮށައި ކުދިކުރަމުންދާ ބައެއް ކަމަށް ހުތުބާގައި ބުންޏެވެ.
"އެއީ ކޮން ބައެއްތޯ ސުވާލު ކުރެއްވުމުން ޖިބްރީލުގެފާނު ވިދާޅުވީ އެއީ މީސްތަކުންނަށް ހެޔޮ ކަންތައް ކުުރުކޮށް މުންކަރާތްތައް ނަހީކުރާއިރު އެ މީހުންގެ އަމިއްލަ ނަފުސުތަކުގެ މަތިން ހަނދާން ނައްތާލައިފާވާ މީހުން ކަމުގައެވެ."
އެ ނޫންވެސް އެތައް ކަމެއް އެ ރޭ އެކަލޭގެފާނަށް ފެނިވަޑައިގަތް ކަމަށާއި ރޭގަނޑާއި ދުވާލު ނެތިމޮށުމާއި މީހުންގެ އަބުރާ ބެހުމުގައި ތިމާމެންގެ ވަގުތުތައް ހޭދަކުރާ މީހުން އެ ކަމާ މެދު ވިސްނައި އެފަދަ ފާފަތަކުން ދުރުހެލިވުމަށް ޢަޒުމު ކަނޑައަޅަން ޖެހޭނެކަމަށް ހުތުބާގައި ބުނެފައި ވެ އެވެ.
އިސްރާއަކީ ރޭގަނޑުން ބައެއްގައި މާތް الله މާތްކުރައްވާފައިވާ މައްކާގެ އަލްމަސްޖިދުލް ޙަރާމުން ފަލަސްޠީނުގެ ބައިތުލްމަޤްދިސްގައިވާ އަލްމަސްޖިދުލް އަޤްޞާއަށް އެކަލާނގެ ކީރިތި ރަސޫލާ ގެންދެވި ދަތުރުފުޅެވެ. މިޢުރާޖަކީ ބައިތުލްމަޤްދިސްގައިވާ އަލްމަސްޖިދުލް އަޤްޞާއިން ހަތްވަނަ އުޑުގެ މައްޗަށް ކީރިތި ރަސޫލާ ގެންދެވި ދަތުރުފުޅެވެ.
ކީރިތި ރަސޫލާގެ އިސްރާޢާއި މިއުރާޖު ދަތުރުފުޅުގެ ތެރޭގައި މާތްﷲ މި އުއްމަތަށް ދެއްވި އެންމެ އަގުބޮޑު ނިޢުމަތަކީ ފަރުޟު ފަސް ނަމާދު ވާޖިބު ކުރެއްވުން ކަމުގައި ވެސް ޚުތުބާގައި ބުނެފައިވެ އެވެ.
