ރާއްޖެ ތަރައްގީ ކުރަނީ އެކުވެރި އަރަބި އިމާރާތް (ޔޫއޭއީ)ގެ އިލްމާއި ރާއްޖެއިން ހިއްސާ ކުރާ ތަަޖުރިބާއަށް ބަލައިގެން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ޔޫއޭއީގެ ދުބާއީގެ މަދީނަތު ޖުމެއިރާގައި މި މަހުގެ 12 އިން 14 އަށް ކުރިއަށްދާ ވޯލްޑް ގަވާމެންޓް ސަމިޓްގައި ވާހަކަފުޅު ދައްކަވަމުން ރައީސް ވިދާޅުވީ، ހުރިހާ ގައުމަކާއެކުވެސް ރާއްޖޭގެ ގުޅުން ބިނާވެފައި ވަނީ، އިގްތިސާދީ އަދި ސިޔާސީ ހަރުދަނާކަމާއި، ރައްޔިތުންގެ ބޭނުންތަކަށް ހައްލު ހޯދުމުގެ މައްޗަށް ކަަމަށެވެ. އަދި ދެގައުމުގެ މެދުގައި އިހްތިރާމާއި، އެއްބަޔަކު އަނެއް ބަޔަކަށް ފައިދާކުރުމުގެ މައްޗަށް ކަަމަށްވެސް ވިދާޅުވިއެވެ.
"ސަރުކާރުތަކެއްގެ ގޮތުގައި އަޅުގަނޑުމެންގެ ކޮމިޓްމަންޓަކީ، ފުރަތަމަ ކަމަކަށް، އަޅުގަނޑުމެންގެ ރައްޔިތުން. އަޅުގަނޑުމެން އެންމެ ބޮޑު އިސްކަމެއް ދެނީ، އެ ރައްޔިތުންގެ ވާހަކަތައް އަޑުއަހައި، އެކުދިން ކުރިއަރުވައި، މުޖުތަމައުގެ ކުރިއެރުމަށްޓަކައި، އެ ރައްޔިތުންގެ އަމާޒަށް އެއްބާރުލުން ދީގެން، އެ ރައްޔިތުންނަށް އެންމެ ފައިދާހުރި ކަންތައްތައް ކޮށްދިނުން.". ރައީސް ވިދާޅުވިއެވެ.
އަދި މި ސަރުކާރު އައީ ރައްޔިތުންނަށް ހިދުމަތް ކުރަން ކަމަށާއި، ރައްޔިތުންނަށް ހިދުމަތް ކުރުމަށްޓަކައި، ހުރިހާ ބޭފުޅުންނާ އެކީގައި، ބައިވެރިންގެ ގޮތުގައި މަސައްކަތް ކުރެއްވުމަށް ގަސްދު ކުރައްވާ ކަމަށް ރައީސް ވިދާޅުވިއެވެ.
ރައީސް ވިދާޅުވީ، ރާއްޖެ ތަރައްގީ ކުރުމުގައި ޔޫއޭއީގެ އިލްމުން އިބްރަތް ހާސިލްކޮށް، ރާއްޖޭގެ ތަޖުރިބާތައް ހިއްސާ ކުރުމަށް ޝައުގުވެރިވާ ކަަމަށެވެ.
އަދި އެކުވެރި ގައުމުތައް ދޫކޮށްލައިފިނަމަ ކުރިއެރުމެއް ފުރިހަމައެއް ނުވާނެކަމަށްވެސް ރައީސް ވަނީ އެމަނިކުފާނުގެ ވާހަކަފުޅު ނިންމަވާލައްވަމުން ވިދާޅުވެފައެވެ.
"ތަރައްގީއަކީ ތިމާއަށް އިހްތިރާމްކުރާ އަވަށްޓެރިންނާއި ރަހުމަތްތެރިން ކުރިއަރުވަންޖެހޭ ކަމެއް. އެހެންވީމާ، މިއަދު އަޅުގަނޑުމެން، ދަތިކަމާއި، ހިޔާލުތަފާތުވުންތައް ފަހަނަޅައިދާ ފަދަ ޕާޓްނަރޝިޕެއް އުފައްދަންވީ.". ރައީސް ވިދާޅުވިއެވެ.
