ގދ. ގައްދު އާއި އެ ރަށް ކައިރީގައި އޮންނަ މާވަރުލު އެއާޕޯޓު، ބްރިޖަކުން ގުޅުވައިލާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ގދ. އަތޮޅަށް މިހާރު ރައީސް ކުރައްވަމުން ގެންދަވާ ދަތުރުފުޅުގައި ގައްދު އަށް ވަޑައިގެން އެ ރަށުގެ ރައްޔިތުންނާ ވާހަކަފުޅު ދައްކަވަމުން އެ މަނިކުފާނު ވިދާޅުވީ، މާވަރުލު އެއާޕޯޓު ތަރައްގީ ކުރުމަށް ގިނަ މަސައްކަތްތަކެއް ކުރަންޖެހޭ ކަމަށާއި އެކަން މި ސަރުކާރުން ކޮށްދޭނެ ކަމަށެވެ.
ނަމަވެސް ރައީސް ވިދާޅުވި ގޮތުގައި، އެކަން ކުރުމަށް ބަޖެޓުން ޖާގަ ހޯދުމަށް ވަގުތު ނަގާނެ އެވެ.
"އެ އެއާޕޯޓާއި [މާވަރުލު] މި ރަށާ [ގައްދޫ] އެއްގަމުން ގުޅާލެވޭނެ. އެކަން ކުރަން ބަޖެޓުން ޖާގަ ހޯދަން ޖެހޭތީ، އެކަމަކު އެ އިންތިޒާރަށް ނިމުމެއް ގެނެސްދޭނަން،" ރައީސް ވިދާޅުވި އެވެ.
ގައްދޫގައި ބިމުގެ ދަތިކަމަށް ހައްލު ހޯދުމުގެ ގޮތުން ބިން ހިއްކައި ދެއްވާނެ ކަމަށާއި އެކަމަކު އެކަން މި އަހަރުގެ ބަޖެޓުގައި ހިމެނިފައި އަދި ނެތް ކަމަށް ރައީސް ވިދާޅުވި އެވެ. ނަމަވެސް އެކަމަށް ކުރަންޖެހޭ މަސައްކަތްތަކާ އެކު، އެ މަސައްކަތް ވެސް ކޮށްދެއްވާނެ ކަމަށް ރައީސް މުއިއްޒު ވިދާޅުވި އެވެ. އަދި ގައްދު އަށް ބޭނުންވާ ހޮސްޕިޓަލު ވެސް އިމާރާތް ކޮށްދެއްވާނެ ކަމަށް ރައީސް ވަނީ ވިދާޅުވެފަ އެވެ.
