ރަމަޟާން މަހު ދެއްވާފައިވާ ކާމިޔާބީތަކުގެ ތެރެއިން އެއް ކާމިޔާބީއަކީ މީހާގެ މުޅި ޢުމުރުގައި ކޮށްފައިވާ ފާފައިން ޠާހިރުވުމުގެ ފުރުޞަތު ލިބިގެން ދިޔުން ކަމަށް މިއަދުގެ ހުކުރު ޚުތުބާގައި ބުނެފި އެވެ.
މިއަދުގެ ހުކުރު ޚުތުބާ ޚާއްސަކޮށްފައިވަނީ "ކާމިޔާބީތަކެއްގެ މައްސަރު” މިމަޢުޟޫއަށެވެ.
ޚުޠުބާގައި ބުނެފައިވަނީ ރަމަޟާން މަހަކީ ބަރަކާތުން ފުރިގެންވާ މައްސަރެއްކަމަށާއި މިމަހު މާތް اللهُ އިސްލާމީ އުއްމަތަށް ގިނަގުނަ ކާމިޔާބީތަކެއް ދެއްވާފައިވާކަމަށެވެ. އެގޮތުން އެއް ކާމިޔާބީ އެއީ ލައިލަތުލް ޤަދުރި ވިލޭރޭގެ މަތިވެރި ފުރުޞަތު ކަމަށާއި، އެރޭގެ ހެޔޮކަން އެއްހާސް މައްސަރުގައި ކޮށްފައިވާ ހެޔޮކަމަށްވުރެ ބޮޑުކަން ޚުޠުބާގައިވަނީ ހަނދާންކޮށްދީފައެވެ.
"މުސްލިމް އަޚުންނޭވެ! ބަރަކާތުން ފުރިފައިވާ ދުވަސްތައް ފެށުނުތާ އަދި މާގިނަ ދުވަސްތަކެއް ވީހެނެއް ހިޔެއް ނުވެއެވެ. މިހާރު މިވަނީ ނިމުމަކާ ގާތްވެފައެވެ. އަހަރުގެ ތެރޭގައި އަންނަ އެންމެ މާތް ރޭގެ ދަރުމަ ލިބޭތޯ ރޭ އަޅުކަން އިތުރު ކުރުމަށް މަސައްކަތް ކުރާށެވެ! މާތް ރަސޫލާ އާއި އެކަލޭގެފާނުގެ އަހުލުބައިތުންވެސް ރޭއަޅުކަމަށް ނަންގަވައެވެ. ފަހުދިހައިގާ އިހުނަށް ވުރެ ބޮޑަށް ހީވާގިވެ ވަޑައިގަންނަވައެވެ. އިޢުތިކާފަށް އިންނަވައެވެ." ޚުޠުބާގައި ވިދާޅުވިއެވެ.
ރަމަޟާން މަހުގެ ކާމިޔާބީތަކުގެ ތެރެއިން އަނެއް ކާމިޔާބީއަކީ، ބަދުރު ހަނގުރާމައިގައި މުސްލިމުންނަށް ދެއްވި ނަޞްރު ކަމަށް ޚުތުބާގައި ބުނެފައި ވެ އެވެ. މިހަނގުރާމައިން ލިބޭ ފިލާވަޅުތަކަށް އަލިއަޅުވާލަމުން ޚުތުބާގައި ބުނީ މިހަނގުރާމައިން ލިބޭ އެއް ފިލާވަޅަކީ ޢަދުލުވެރިކަމުގެ ފިލާވަޅުކަމަށާއި، މާތް ރަސޫލާ އެހެން ބައެއްގެ މައްޗަށް ޢަދުލުވެރިކަން ހިންގެވުމުގެ ކުރިން ޚުދު އެކަލޭގެފާނުގެ ނަފުސުގެ މައްޗަށް ޢަދުލުވެރިކަން އިސްކުރެއްވިކަމަށެވެ.
މި ހަނގުރާމައިން ލިބޭ އަނެއް ފިލާވަޅަކީ އިސްލާމްދީނުގެ ޢަޤީދާ ހިތުގައި ވަރުގަދައަށް އަށަގެންފިނަމަ، އެމީހަކަށް ދެންހުރި ހުރިހާކަމެއް ފަސޭހަވާނެކަން ކަމަށް ޙުޠުބާގައި ބުންޏެވެ. ބަދުރު ހަނގުރާމައިގައި ބަފައިން ދަރިންނާ، ދަރިން ބަފައިންނާ އަޚުން އަޚުންނާ، ގާތްތިމާގެ މީހުން ގާތްތިމާގެ މީހުންނާ އަދި ރައްޓެހިން ރައްޓެހިންނާ، ހަނގުރާމަ ކުރިއެވެ.
"ފަލަސްޠީނުގައި ހިނގަމުންދާ ހަނގުރާމައިގައިވެސް އެބައިމީހުންގެ ހިތްވަރާއި ޢަޒުމުގެ ވަރުގަދަކަން ނިކަން ދެކޭށެވެ! ހެއްދެވިފަރާތަށް އޮތް އިތުބާރުގެ ބޮޑުކަން ދެކި އެކަންކަމުން ޢިބުރަތް ލިބިގަންނާށެވެ! މުސްލިމުންގެ މޮޓޯ އަކީ ހަމަ އެއް މޮޓޯ އެކެވެ! "މާތް اللهُ ގެ މަގުގައި ޝަހީދުވުން، ނުވަތަ ނަޞްރު ލިބުމެވެ." ޙުޠުބާގައި ވިދާޅުވިއެވެ.
ޙުޠުބާގައި ވަނީ އެނބުރި ރުޖޫޢަވާންޖެހޭ ދުވަހުގެ ދަތުރަށް ލިބިގެންވާ އެންމެ ރަނގަޅު ކޮއްތަކީ ތަޤްވާވެރިކަންކަމަށާއި ތަޤްވާވެރިވުމަށް އަވަސްވުމަށް ނަސޭހަތްތެރިވެފައެވެ.
