އެމްޑީޕީގެ ވެރިކަމެއް އޮވެ އަދި ރައްޔިތުންގެ މަޖިލީހުގެ މެޖޯރިޓީ އެ ޕާޓީގެ އަތުގައި އޮވެގެން މާލޭ ރައްޔިތުންނަށްޓަކައި ކޮށްދެވުނު ކަމެއް ނެތް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މައްޗަންގޯޅި އުތުރު ދާއިރާގެ ޕީއެންސީ ކެންޑިޑޭޓް އިބްރާހިމް މުހައްމަދުގެ ކެމްޕޭން ހަރަކާތް ރަސްމީކޮށް ފައްޓަވާ، ޖަގަހަ ހުޅުވުމަށް ބޭއްވި ޖަލްސާގައި މިރޭ ވާހަކަފުޅު ދައްކަވަމުން ރައީސް ވިދާޅުވީ އެމްޑީޕީން 2018 ގައި ވެރިކަމަށް އަންނަން ވެގެން އަދި 2019 ގެ މަޖިލިސް އިންތިހާބުގެ ކެމްޕޭނުގައި ވެސް މާލޭގެ ރައްޔިތުންނަށް ގޯތި ދޭނެ ވާހަކަ އާއި ފްލެޓު ދޭނެ ވާހަކަ ދެއްކި ކަމަށާއި ވެރިކަމާއި ސުޕަރމެޖޯރިޓީ ލިބުމުން އެކަން ވެސް ނުވިކަމަށެވެ. އަދި ގެދޮރުގެ މައްސަލަ ހައްލުކުރާނެކަމަށް ބުނެ ކުރެވުނު ކަމެއް ނެތްކަމަށް ރައީސް ވިދާޅުވި އެވެ.
ރައީސް ވިދާޅުވީ މި ސަރުކާރުން އެ މައްސަލަ އަށް ހައްލެއް ގެނައުމަށް ވެރިކަމުގެ ފުރަތަމަ މަހުން ފެށިގެން ވެސް މަސައްކަތް ކުރަމުންދާ ކަމަށެވެ. އެގޮތުން އަމިއްލަ ގޯތީގައި ގެދޮރު އިމާރާތް ކުރުމަށް، ފަސް ޕަސަންޓަށް ވުރެ އިންޓްރަސްޓް ބޮޑުނުވާ ގޮތަށް ދޫކުރާ ގެދޮރުގެ ލޯނުގެ މަސައްކަތް ކުރިއަށްދާ ކަމަށް ވެސް ރައީސް ވިދާޅުވިއެވެ.
