މާލެ ސިޓީ ކައުންސިލްގެ ޑެޕިއުޓީ މޭޔަރުގެ މަގާމަށް ޕީޕީއެމްގެ ފަރާތުން ވާދަކުރައްވާނެ ކައުންސިލަރެއްގެ ގޮތުން މާފަންނު މެދު ދާއިރާގެ ކައުންސިލް މެމްބަރު އަހުމަދު ނަރީޝް ހޮވިވަޑައިގެންފި އެވެ.
ޑެޕިއުޓީ މޭޔަރަކަށް ނަރީޝް ކުރިމަތިލައްވަން ޕީޕީއެމްއިން ނިންމީ އެކަމަށްޓަކައި މިއަދު މެންދުރުފަހު 1:00 ގައި ނެގި ވޯޓަކުންނެވެ.
މާލެ ސިޓީ ކައުންސިލަށް ހޮވިވަޑައިގެންނެވި ޕީޕީއެމްގެ ހުރިހާ ކައުންސިލަރުންގެ މެދުގައި ނެގި ސިއްރު ވޯޓަކުން ނަރީޝްއަށް އަގުލަބިއްޔަތު ލިބުނީ 5 ވޯޓުންނެވެ. ޑެޕިއުޓީ މޭޔަރުކަމަށް ވާދަކުރެއްވި ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއުއަށާއި ވިލިމާލެ ދާއިރާގެ ކައުންސިލަރު ނަހުލާ އަލީއަށް ލިބިވަޑައިގެންނެވީ 4 ވޯޓެވެ.
ޕީޕީއެމް ޓިކެޓުގައި އިންތިހާބުގައި ވާދަކުރައްވައި މާލެ ސިޓީ ކައުންސިލަށް ހޮވިވަޑައިގެންނެވީ 12 މެމްބަރުންނެވެ. މީގެ އިތުރުން ޖޭޕީގެ ޓިކެޓުގައި ވާދަކުރައްވައި ކައުންސިލަށް ހޮވިވަޑައިގެންނެވި މެމްބަރަކު ވަނީ ޕީޕީއެމްއަށް ސޮއިކުރައްވައިފަ އެވެ. މިއާއެކު ޕީޕީއެމްއަށް ނިސްބަތްވާ 13 މެމްބަރުން މިހާރު މާލެ ސިޓީ ކައުންސިލްގައި ތިއްބަވަ އެވެ.
މާލެ ސިޓީ ކައުންސިލްގެ އަގުލަބިއްޔަތު ޕީޕީއެމްއަށް އޮތް އިރު ބެލެވޭ ގޮތުގައި ޕީޕީއެމްއިން ޑެޕިއުޓީ މޭޔަރުގެ މަގާމަށް ކުރިމަތިލައްވާ ބޭފުޅަކު އެމަގާމަށް ހޮވިވަޑައިގަންނަވާނެ އެވެ.
