ޚިދުމަތް ދިނުމުގައި އިންސާނީ ބައިވެރިވުން މަދުކޮށް، ޑިޖިޓަލައިޒް ކުރެވޭ ހިސާބުން ކޮރަޕްޝަންގެ ފަސާދަ ކުޑަވެގެންދާނެ ކަމަށާއި، މިކަންކަން ކުރައްވާނީ އެކަމަށް ބޭނުންވާ ޤާނޫނުތައްވެސް ހައްދަވައިގެން ކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
މާޅޮސްމަޑުލު އުތުރުބުރީގެ ބައެއް ރަށްތަކަށް ރައީސް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ރ. އުނގޫފާރަށް ވަޑައިގެން އެ ރަށުގެ ރައްޔިތުންނާ މުޚާޠަބު ކުރައްވައި ދެއްކެވި ވާހަކަފުޅުގައި ޤައުމީ ފެންވަރުގައި ހުރި ބޮޑެތި ބައެއް މައްސަލަތަކަށް ޙައްލު ހޯއްދެވުމަށް ސަރުކާރުން ގެންގުޅުއްވާ ވިސްނުންފުޅާއި، ޢަމަލީ ގޮތުން ކުރައްވަމުން ގެންދަވާ މަސައްކަތްޕުޅުތަކަށް އަލިއަޅުއްވާލައްވަމުން ރައީސް ވިދާޅުވީ، އެންމެ މުހިންމު އެއް ކަމަކީ ރާއްޖެއަކީ ކޮރަޕްޝަނާއި ރިޝްވަތުގެ ފަސާދައިން މުޅިން ނުވަތަ ވީހާވެސް ބޮޑަކަށް ސަލާމަތްވެފައި އޮތް ޤައުމަކަށް ހެއްދެވުން ކަމަށެވެ.
މިގޮތުން ދާދި ފަހުން އެސްޓޯނިއާއަށް ކުރެއްވި ދަތުރުފުޅަށް އިޝާރާތްކުރައްވާ ވާހަކަފުޅު ކުރިއަށް ގެންދަވަމުން ރައީސް ވަނީ، އެސްޓޯނިއާ ފަދައިން، ދިވެހިރާއްޖެއަކީވެސް އާންމު ޚިދުމަތްތަކާ ގުޅޭ ހުރިހާ ކަމެއް އެއް ވިއުގައެއްގެ ތެރެއިން ޑިޖިޓަލައިޒްކޮށްގެން ޚިދުމަތް ދެވޭ ޤައުމަކަށް ހެއްދެވުމަށް މަސައްކަތްތަކެއް ކުރެވެމުންދާކަން ފާހަގަކުރައްވައިފައެވެ.
މީގެ އިތުރުން ރައީސް ވަނީ، ދުންފަތުގެ އިސްތިޢުމާލު ކުރުމާއި ގުޅިގެން ދާދި ފަހުން ޤާނޫނަށް ގެންނެވި ބަދަލުތަކަށް ފާޑުކިއުންތައް އަމާޒުކޮށް، ޙަޤީޤަތް އޮޅޭ ފަދަ ގޮތަށް ދެކެވެމުންދާ ވާހަކަތަކަށްވެސް ރައްދު ދެއްވާފައެވެ. މި ބަދަލުތަކަކީ ވަކި ބަޔަކަށް ފައިދާއެއް ހޯއްދަވައިދެއްވުމަށް ކުރެއްވި ކަމެއް ނޫން ކަމަށާއި، ސަރުކާރުގެ ވިސްނުން ހުރީ ބޭސްފަރުވާގެ ޚިދުމަތް ފޯރުކޮށްދިނުމުގެ އިތުރުން، ބަލި ޖެހުމުގެ ކުރިން އެ ބަލިތަކުން ދިފާޢުވުން ނުވަތަ ޕްރިވެންޓިވް ހެލްތު ކެއަރގެ ރާސްތާއިން ކުރިއަށް ދިއުން ކަމުގައި ފާހަގަކުރެއްވިއެވެ. އެހެން ކަމުން ރަށު ރޫޙުގައި ރައްޔިތުން ތެދުވެ، އެ ރަށަކީ ދުންފަތުގެ ވަބާއިން ސަލާމަތްވެފައިވާ ރަށަކަށް ހެދުމަށް މަސައްކަތް ކުރުމަށްވެސް ރައީސް ވަނީ ހިތްވަރުދެއްވާފައެވެ.
