ފުވައްމުލަކު ސިޓީގެ މުހައްމަދު ޖަމާލުއްދީން ސްކޫލްގައި 16 ކްލާސްރޫމްގެ މަސައްކަތް ބަޔަކާއި ހަވާލުކޮށްފި އެވެ.
މިއަދު އެޑިކޭޝަން މިނިސްޓްރީގައި އޮތް ރަސްމިއްޔާތެއްގައި ސޯޅަ ކްލާސް ރޫމްގެ އިތުރުން ކޮމްޕިއުޓަރ ލެބްގެ އިމާރާތުގެ މަސައްކަތާއި ފުވައްމުލަކު ސްކޫލްގެ މަލްޓި ޕަރޕަސް ހޯލް އިމާރާތުގެ މަސައްކަތް ހަވާލުކުރުމުގެ އެގްރިމަންޓްގައި ވަނީ ސޮއި ކޮށްފަ އެވެ.
މިއަހަރު ގެ ޕީ.އެސް.އައި.ޕީގެ ދަށުން ކުރިއަށް ގެންދެވޭ މި ދެ މަޝްރޫއު ވެސް ހަވާލުކޮށްފައިވަނީ އިނޯކާ ޕްރައިވެޓް ލިމިޓެޑްއާ އެވެ.
މުހައްމަދު ޖަމާލުއްދީން ސްކޫލްގައި 16 ކްލާސްރޫމް އަދި ކޮމްޕިއުޓަރ ލެބް އިމާރާތުގެ މަސައްކަތަށް އެކުންފުނިން ހުށައަޅާފައިވަނީ ބާރަމިލިއަން ބާރަހާސް ނުވަސަތޭކަ ސާޅީސްތިން ރުފިޔާ ތިން ލާރި ކަމަށް އެޑިއުކޭޝަން މިނިސްޓްރީން ހާމަކުރެ އެވެ.
މި މަސައްކަތް 365 ދުވަހުގެ ތެރޭގައި ނިންމާ ދިނުމަށްވެސް އެކުންފުނިން ވަނީ އެއްބަސްވެފަ އެވެ.
