ދުނިޔޭގެ މަޝްހޫރު އޯޓީޓީ ޕްލެޓްފޯމް ނެޓްފްލިކްސްގެ ބޮޑު މަސައްކަތަކުން ބޮލީވުޑް ތަރި ރަންވީރް ސިންގް އާއިއެކު ބްރިޓިޝް އެޑްވެންޗަރާ ބެއާ ގްރިލްސް ފެންނާނެ ކަމަށް މީޑިއާ ރިޕޯޓުތައް ބުނެފި އެވެ.
ރިޕޯޓުތައް ބުނާ ގޮތުން ނެޓްފްލިކްސްއިން އުފައްދާ އެޑްވެންޗާ ޝޯއެއް ރަންވީރަށް ހުށަހަޅައި އޭނާ ވަނީ އެމަސައްކަތަށް އެއްބަސްވެސް ވެފަ އެވެ. މިއަންނަ ޖުލައި އަދި އޯގަސްޓު މަހުގެ ތެރޭގައި ޝޫޓު ކުރަން ހަމަޖެހިފައިވާ މި މަސައްކަތުގެ ޝޫޓިންތައް ކުރިއަށް ގެންދާނީ ސައިބީރިއާގަ އެވެ.
ބެއާ ގްރިލްސް އަކީ ރިއަލިޓީ ޑޮކިއުމެންޓަރީއާއި އެޑްވެންޗާ ޝޯތަކަށް ހާއްސަ ފަރާތެކެވެ. އޭނާ މީގެ ކުރިން ވަނީ "މޭން ވާސަސް ވައިލްޑް"، "ރަނިންގް ވައިލްޑް ވިތު ބެއާ ގްރިލްސް" އަދި "ޔޫ ވާސަސް ވައިލްޑް" ފަދަ ކާމިޔާބު ޝޯތައް އުފައްދައިވަ އެވެ. ބެއާ ގްރިލްސް އަކީ އިނގިރޭސިވިލާތަށް ނިސްބަތްވާ 47 އަހަރުގެ މީހެކެވެ. އޭނާއަކީ މިފަދަ އެޑްވެންޗާ ޝޯތައް ހެދުމުގެ އިތުރުން ޓީވީ ޕްރެޒެންޓަރެއްވެސް މެއެވެ. އަދި އޭނާއަކީ ވިޔަފާރިވެރިއެއްވެސް މެއެވެ.
ރިޕޯޓުތައް ބުނާ ގޮތުން ސައިބީރިއާގައި ޝޫޓު ކުރާ މި ޝޯއަކީވެސް އެޑްވެންޗާ އެކި ސްޓަންޓުތައް ހިމެނޭ ޝޯއެކެވެ. ބެއާ ގްރިލްސް މި ޝޯ ނެޓްފްލިކްސްއަށް ހުށަހެޅުމުން އިތުރު ތަރިއެއް އޭގައި ހިމަނަން ނިންމައި ރަންވީރަށް ހުށަހެޅި ކަމަށްވެސް ރިޕޯޓުތައް ބުނެ އެވެ. މިއީ ނެޓްފްލިކްސްއިން އުފައްދާނެ އެންމެ ބޮޑު އެއް ޝޯކަމަށްވެސް ވަނީ ބުނެފަ އެވެ.
ރަންވީރް ދެން އެންމެ އަވަހަށް ޝޫޓު ކުރާނީ އާލިއާ ބަޓް އާއިއެކު ކަރަން ޖޯހަރު ޑައިރެކްޓު ކުރާ ފިލްމެކެވެ. މިހާރު މަސައްކަތްތައް ނިމިފައި ހުރި ބައެއް ރަންވީރުގެ ބައެއް މަސައްކަތްތައް ރިލީޒް ނުކޮށް އެބަ ހުއްޓެވެ. އެއީ "83"، "ޖަޔޭޝްބައި ޖޯދާރް" އަދި "ސާކަސް" އެވެ. މި ފިލްމުތައް ރިލީޒް ކުރާނީ ކޮވިޑުގެ ހާލަތު ރަނގަޅުވެ އިންޑިއާގެ ސިނަމާތައް ހުޅުވުމުން ކަމަށް ބެލެވެ އެވެ.
