މަޝްހޫރު ސޯޝަލް މީޑިއާ ޕްލެޓްފޯމު، އިންސްޓަގްރާމްގައި އެންމެ ބޮޑު އާމްދަނީއެއް ލިބޭ މީހުންގެ ލިސްޓުގެ 27 ވަނައިގައި ބޮލީވުޑް އަދި ހޮލީވުޑް ތަރި ޕްރިޔަންކާ ޗޯޕްރާ ޖޯނަސް ހިމެނިއްޖެ އެވެ.
މިދިޔަ އަހަރު ޕްރިޔަންކާ އިނީ އެ ލިސްޓުގެ 19 ވަނައިގަ އެވެ. އޭރު ކޮންމެ އިންސްޓަގްރާމް ޕޯސްޓަކަށް ޕްރިޔަންކާ ނަގަނީ ގާތްގަނޑަކަށް 271،000 ޑޮލަރެވެ. އެހެންނަމަވެސް މިއަހަރު އޭނާ ވަނީ ޕޯސްޓަކަށް ނަގާ ފީ ބޮޑުކޮށްފަ އެވެ. އެގޮތުން މިހާރު ޕޯސްޓަކަށް ނަގަނީ 403،000 ޑޮލަރެވެ.
ޕްރިޔަންކާ ޕޯސްޓަކަށް ނަގާ އަގު ބޮޑު ކުރުމުގެ ސަބަބުން ބައެއް ޕްރޮޑަކްޓުތަކާއި ކުންފުނިތަކުން އޭނާ ދޫކޮށްލި އެވެ. އަދި އަގު ހެޔޮ ސެލެބްރިޓީން ގިނަ އިޝްތިހާރުތައް ނެގުމުން "އިންސްޓަގްރާމް ރިޗް ލިސްޓު" ގެ ފަހަތަށް އޭނާ ވެއްޓުނެވެ.
މި ލިސްޓުގައި ހިމެނެނީ ޕްރިޔަންކާގެ އިތުރުން އިންޑިއާގެ އެންމެ މީހެކެވެ. އެއީ އެގައުމުގެ މަޝްހޫރު ކްރިކެޓު ކުޅުންތެރިޔާ ވިރާތު ކޯލީ އެވެ. އޭނާ ހިމެނެނީ ލިސްޓުގެ 19 ވަނައިގައި ޕްރިޔަންކާއަށްވުރެއް ކުރީގަ އެވެ. ވިރާާތުގެ އިންސްޓަގްރާމް ޕޯސްޓަކަށް ނަގަނީ 680،000 ޑޮލަރެވެ.
އިންސްޓަގްރާމުން އެންމެ ބޮޑު އާމްދަނީއެއް ލިބެނީ ފުޓުބޯޅަ ކުޅުންތެރިޔާ ކްރިސްޓިއާނޯ ރޮނާލްޑޯއަށެވެ. ލިސްޓުގެ ކުރީގައި ހިމެނޭ އިތުރު ތަރިންނަކީ ކުރީގެ ފުޓުބޯޅަ ކުޅުންތެރިޔާ ޑޭވިޑް ބެކަމް، މޮޑެލް ޖީޖީ ހަދީދް، ހޮލީވުޑް ތަރި ވިލް ސްމިތު، ލަވަކިޔުންތެރިޔާ އާރިއާނާ ގްރާންޑޭ، މޮޑެލް ކައިލީ ޖެނާގެ އިތުރުން ލަވަކިޔުންތެރިޔާ ޓޭލާ ސްވިފްޓް އެވެ.
