ސޯޝަލް މީޑިއާ ޕްލެޓްފޯމު، އިންސްޓަގްރާމުން އެންމެ ބޮޑު އާމްދަނީއެއް ލިބޭ މީހުންގެ ލިސްޓުގެ އެއްވަނައިގައި މަޝްހޫރު ފުޓުބޯޅަ ކުޅުންތެރިޔާ ކްރިސްޓިއާނޯ ރޮނާލްޑޯ ހިމެނިއްޖެ އެވެ.
މިދިޔަ އަހަރު ރޮނާލްޑޯ ހިމެނުނީ މި ލިސްޓުގެ ތިން ވަނައިގަ އެވެ. އެއީ ކޮންމެ ޕޯސްޓަކަށް 889،000 ޑޮލަރުގެ މަގުންނެވެ. މިހާރު އޭނާއަށް ކޮންމެ ޕޯސްޓަކަށް 1.6 މިލިއަން ޑޮލަރު ލިބެ އެވެ. އޭނާގެ ފޮލޯވަރުންގެ އަދަދަކީ 295 މިލިއަނެވެ.
މިލިސްޓުގެ ދެވަނައިގައި ހިމެނެނީ ހޮލީވުޑް ތަރި ޑްވޭން ޖޯންސަން އެވެ. އޭނާ ކުރާ ކޮންމެ ޕޯސްޓަކަށް ލިބެނީ 1.5 މިލިއަން ޑޮލަރެވެ. ޑްވޭންގެ ފޮލޯވަރުންގެ އަދަދަކީ 242 މިލިއަނެވެ.
ލިސްޓުގެ ތިން ވަނައިގައި ލަވަކިޔުންތެރިޔާ އާރިއާނާ ގްރާންޑޭ ހިމެނޭއިރު ހަތަރުވަނައިގައި ހިމެނެނީ މޮޑެލް ކައިލީ ޖެނާ އެވެ. ފަސްވަނައިގައި ސެލީނާ ގޯމޭޒް އަދި ހަވަނައިގައި މޮޑެލް ކިމް ކާޑޭޝަން ހިމެނެ އެވެ. ލިސްޓުގެ ހަތް ވަނައިގައި އޮތީ ފުޓުބޯޅަ ކުޅުންތެރިޔާ ލައޮނަލް މެސީ އެވެ. އަށްވަނައިގައި ބިޔޯންސޭ ހިމެނޭއިރު ނުވަ ވަނައިގައި ޖަސްޓިން ބީބާ އަދި 10 ވަނައިގައި ކެންޑަލް ޖެނާ ހިމެނެ އެވެ.
މިއަހަރު އިންސްޓަގްރާމުން އާންމުކުރި ރިޗް ލިސްޓަށް ވަނީ ބޮޑެތި ބަދަލުތަކެއް އައިސްފަ އެވެ.
އިންސްޓަގްރާމް ރިޗް ލިސްޓު އެކުލަވައިލަނީ ކޮންމެ އަހަރަކުވެސް ތަރިން ޕޯސްޓުކުރާ ފޮޓޯ ނުވަތަ ސްޓޯރީ މެދުވެރިކޮށް ނަގާ އާމްދަނީއަށް ބެލުމަށްފަހު ކޮންމެ ޕޯސްޓަކަށް ޖެހޭ މިންވަރަށް ބެލުމަށްފަހު އެވެ. އެއްވަނައިގައި އޮތް ރޮނާލްޑޯއަށް މުޅި އަހަރު ގާތްގަނޑަކަށް 40 މިލިއަން ޑޮލަރު އިންސްޓަގްރާމް މެދުވެރިކޮށް ލިބޭނެ ކަމަށް ލަފާކުރެވެ އެވެ. މިއީ ކުޅުންތެރިއެއްގެ ގޮތުގައި އޭނާ ނަގާ އާމްދަނީއަށްވުރެއް ބޮޑު އަދަދެކެވެ. ރޮނާލްޑޯ އަކީ މިވަގުތު ދުނިޔޭގައި ހުރި އެންމެ އަގުބޮޑު އަދި އެންމެ ނުފޫޒު ގަދަ އެއް ސެލެބްރިޓީ އެވެ.
އިންސްޓަގްރާމްގައި ދެވަނައަށް އެންމެ ބޮޑު އާމްދަނީއެއް މުޅި އަހަރުގެ ތެރޭގައި ހޯދާނެ ކަމަށް ބެލެވެނީ ކުޅުންތެރިޔާ ލައޮނަލް މެސީ އެވެ. އޭނާއަށް މުޅި އަހަރު ގާތްގަނޑަކަށް 23.3 މިލިއަން ޑޮލަރު ލިބޭނެ ކަމަށް ބެލެވެ އެވެ. ތިންވަނައަށް އެންމެ ބޮޑު އާމްދަނީއެއް ލިބޭނެ ކަމަށް ލަފާކޮށްފައިވަނީ ކެންޑަލް ޖެނާ އަށެވެ. އެއީ 15.9 މިލިއަން ޑޮލަރެވެ.
