ދީނީ ނަޒަރަކުން ބަލާނަމަ ވެކްސިން ޖެހުމަކީ މުހިންމު ކަމެއް ކަމަށް ކުރީގެ އިސްލާމިކް މިނިސްޓަރ ޑރ މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޝަހީމް ކުރެއްވި ޓުވީޓެއްގައި ވިދާޅުވީ، ގައިން ގަޔަށް އަރާ ބަލިމަޑުކަމުގެ ވަބާއެއްގެ ތެރޭގައި އެއިން ރައްކާތެރިވުމަށްޓަކައި ވެކްސިންޖެހުމަކީ ދީނީ ނަޒަރުން ބަލާއިރު ވެސް މުހިންމުކަމެއް ކަމަށެވެ. އަދި ފުރާނަ ސަލާމަތްކުރުމަކީ ޝަރުއުގެ މަގުސަދެއް ކަމަށާއި ފުރާނަ ޙިމާޔަތްކުރުމަށްޓަކައި ރައްކާތެރިކަމުގެ ފިޔަވަޅުއެޅުމަކީ ލާޒިމުކަމެއް ކަމަށް ޝަހީމްގެ ޓުވީޓްގައި ވިދާޅުވެފައިވެއެވެ.
ޝަހީމް މި ގޮތަށް ވިދާޅުވެފައިވާއިރު ކޮވިޑް19 އިން ރައްކާތެރިވުމަށްޓަކައި ވެކްސިން ޖެހުމަށް ބައެއް ފަރާތްތަކުން ދަނީ ދެކޮޅު ހަދަމުންނެވެ. އަދި އަލަށް އުފަންވާ ކުދިންނަށް ވެކްސިން ދިނުމަކީވެސް ބައެއް ފަރާތްތަކުން ގަބޫލުނުކުރާ ކަމެކެވެ. އެހެން ނަމަވެސް ބަލިތަކުން ރައްކާތެރިވުމަށްޓަކައި ވެކްސިން ޖެހުމަކީ ވަރަށް މުހިންމު ކަމެއް ކަމުގައި ސިއްހީ މާހިރުންވެސް ވިދާޅުވެއެވެ.
