ރައްޔިތުންގެ މަޖިލީހުގެ 241 ކޮމިޓީން ސަލާމަތީ ހިދުމަތްތަކުގެ ސެކިއުރިޓީ ބްރީޗުވި ގޮތުގެ އިންކުއަރީ ރިޕޯޓާއި ގުޅިގެން އަޅުއްވަންޖެހޭ ފިޔަވަޅުތައް އެޅުވުމުގައި ރައީސް އިބްރާހިމް މުހައްމަދު ސޯލިހު ފަސްޖެހިވަޑައި ނުގަންނަވާނެކަން ހިތުގައި ޝައްކެއް ނެތް މިންވަރަށް ކަށަވަރުވާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
241 ކޮމިޓީން އިންކުއަރީ ކުރިއަށް ގެންދިޔައީ ރައީސް ނަޝީދަށް އަމާޒުކޮށް ދިން ޓެރަރިސްޓު ހަމަލާގައި ސަލާމަތީ ހިދުމަތްތަކުން އެމަނިކުފާނަށް އަރުއްވަމުން ގެންދެވި އެންމެ މަތީ ފެންވަރުގެ ސެކިއުރިޓީ ފޫއަޅުވައިލުމާއި ގުޅިގެންނެވެ.
ރިޕޯޓު ރައީސް ސޯލިހަށާއި އުއްތަމަ ފަނޑިޔާރުގެ އިތުރުން ރައީސް ނަޝީދަށް ވަނީ އަރުވައިފަ އެވެ. އެގޮތުން ރައީސް ނަޝީދަށް މި ރިޕޯޓު އެރުވުމަށް އިއްޔެ ބޭއްވި ރަސްމިއްޔާތުގައި ބައިވެރިވެވަޑައިގެން ރާއްޖެއިން ބޭރުގައި ހުންނަވައި ނަޝީދު ވިދާޅުވީ ރިޕޯޓުގައި އިސްލާހު ކުރަންޖެހޭ ކަމަށާއި އަޅަންޖެހޭ ފިޔަވަޅުތައް ފާހަގަކޮށްފައިވާއިރު އެކަންކަން ކުރައްވަން ރައީސް ފަހަތަށް ޖެހިވަޑައިނުގަންނަވާނެ ކަމަށެވެ. ނަޝީދު ވިދާޅުވީ އަޅުއްވަން ޖެހިވަޑައިގަންނަވާ އެންމެހާ ފިޔަވަޅުތައް އަވަހަށް އަޅުއްވަން ގޮވައިލައްވާ ކަމަށެވެ.
"އަދި ބައްލަވަން ޖެހިވަޑައިގަންނަވާ ހުރިހާ ކަމެއް އަވަހަށް ބައްލަވާށޭ. ސަލާމަތީ ހިދުމަތްތަކުގެ ތެރޭގައި ހިނގަމުންދާ ކަންކަން އެއީ އަޅުގަނޑުމެން ކަންބޮޑުވާ ކަންތައްތަކުގެ ގޮތުގައި، އޭގެ ތެރެއިން ގިނަ، ބައެއް ކަންކަން މި ރިޕޯޓުގައި އެބަ ފާހަގަވޭ. އެކަންކަން އަޅުގަނޑުމެން އަވަހަށް ރަނގަޅު ކުރަން ޖެހޭނެ"
- މަޖިލިސް ރައީސް މުހައްމަދު ނަޝީދު
ނަޝީދު ވިދާޅުވީ ރިޕޯޓުގައި ބަޔާންކޮށްފައިވާ އިރުޝާދާއި ލަފާ ހެޔޮ ގޮތުގައި ބަލައިގަންނަވަން ޖެހޭކަމަށެވެ. މިއީ ރާއްޖޭގެ ރައްޔުތުންނަށް މިވަގުތަށް އެންމެ ބޭނުންތެރި ކަންތައް ކަމުގައިވެސް ނަޝީދު ވިދާޅުވި އެވެ.
މީގެ އިތުރުން އެމަނިކުފާނު ވަނީ އުއްތަމަ ފަނޑިޔާރަށްވެސް މި ރިޕޯޓުގައި އިރުޝާދުތަކެއް އަރުވާފައިވާ ކަަމަށާއި އެކަމަށް އަމަލު ކުރުންވެސް ވަރަށް މުހިންމު ކަމަށެވެ. އެގޮތުން ޝަރީއަތުގައި ކަންކަން ކުރިއަށް ގެންދާއިރު ގެންގުޅުއްވަންވީ އުސޫލުތަކާއި ހަމަތައް މި ރިޕޯޓުން ފާހަގަކުރެވިގެންދާނެ ކަމަށް ނަޝީދު ވިދާޅުވި އެވެ.
ރައީސް ސޯލިހަށް އިއްޔެ ރިޕޯޓު އެރުވިއިރު އެއާއި ގުޅިގެން އަޅުއްވަންޖެހޭ ފިޔަވަޅުތައް އަޅުއްވާނެ ކަމުގެ ޔަގީންކަން އެމަނިކުފާނު ދެއްވި އެވެ.
މަޖިލިސް އިންކުއަރީ ރިޕޯޓުގައި ޑިފެންސް މިނިސްޓަރު މާރިޔާ ދީދީއާއި ހޯމް މިނިސްޓަރު އިމްރާން އަބްދުﷲގެ އެތައް އިހުމާލެއް ވަނީ ފާހަގަކޮށްފަ އެވެ. އެމްޑީޕީގެ އިސް އެކްޓިވިސްޓުން ގެންދަނީ މި ދެ ބޭފުޅުން މަގާމުން އިސްތިއުފާ ދެއްވުމަށްވެސް ގޮވައިލައްވަމުންނެވެ.
މާރިޔާ އާއި މަޖިލިސް މެމްބަރު އިލިޔާސް ލަބީބުގެ މައްސަލަ ފުލުހުންވެސް އަންނަނީ ބަލަމުންނެވެ. ރައީސް ނަޝީދަށް ދިން ހަމަލާގެ މައުލޫމާތު އިލިޔާސްއަށް ލިބި އެކަން މާރިޔާއަށް އެންގެވިކަމަށް ރިޕޯޓުގައި ބުނެފައިވީނަމަވެސް އިލިޔާސްއަށް މައުލޫމާތު ދިން މީހެއްގެ މައުލޫމާތު ރިޕޯޓުގައި ނެތެވެ. 241 ކޮމިޓީން އެމައުލޫމާތު ނުހޯދީ އެކަން ފުލުހުން ބަލަމުން ދާތީކަމަށް ކޮމިޓީގެ މެމްބަރަކު ވަނީ ވިދާޅުވެފަ އެވެ.
ޑިފެންސް މިނިސްޓަރު މާރިޔާ މީގެ ކުރިން ވިދާޅުވެފައިވަނީ އިލިޔާސް މައުލޫމާތު އެރުވީ ފޯނުން ކަމަށް ވުމުން އެއީ މައުލޫމާތެއްގެ ގޮތުގައި ނުބެލެވޭ ކަމަށާއި އެއީ ހަަމައެކަނި ފޯން ކޯލެއް ކަމަށެވެ. އިލިޔާސްއަށް ލިބުނު މައުލޫމާތު ފުލުހުންނަށްވެސް ރަސްމީކޮށް ހިއްސާކުރައްވައިފައެއް ނުވެ އެވެ.
