މިއަހަރުގެ ޖުލައި މަހުގެ ފަހުން ރާއްޖޭގައި ކުރިން ބޭނުން ކުރަމުން އައި ނޫޓަށް ބަދަލު ނުދޭނެ ކަމަށް އެމްއެމްއޭއިން ބުނެފިއެވެ.
މޯލްޑިވްސް މަނިޓަރީ އޮތޯރިޓީން އާއްމު ކުރި ވީޑިއޯއެއްގައި ބުނެފައިވަނީ އެމްއޭގެ ގާނޫނުގެ ދަށުން އުވާލާފައިވާ ނޫޓަށް ބަދަލު ދިނުމަށް ހަމަޖެހިފައިވަނީ ކަނޑައެޅޭ ވަކި ތާރީހެއްގެ ތެރެއިން ކަމަށެވެ. އަދި ރަންދިހަފަހެއް ނޫޓޫ ސީރީޒް ބޭނުން ކުރަން ފެށިއިރު ބޭނުން ކުރަމުން އައި ކަރުދާސް ނޫޓު ސީރީޒްގެ ނޫޓުތަކަށް ބަދަލު ދިނުމަށް ހަމަޖެހިފައިވާ އެންމެ ފަހުގެ ތާރީހަކީ 31 ޖުލައި 2021 ކަމަށެވެ.
އެމްއޭއިން ބުނީ މިތާރީހުގެ ފަހުން އެ ނޫޓު ތަކަށް ބަދަލު ހޯދުމުގެ ފުރުސަތު ނޯންނާނެ ކަމަށެވެ.
އެ އޮތޯރިޓީން މިހާރު ބަދަލު ދެމުން އަންނަނީ ރައީސުލްޖުމްހޫރިއްޔާގެ ގަރާރަކުން 2016ވަނަ އަހަރުގެ އޯގަސްޓް މަހުގެ އެއްވަނަ ދުވަހުން ފެށިގެން ލީގަލްޓެންޑަރ ނޫން ކަމުގައި ކަނޑައަޅުއްވާފައިވާ 2 ރުފިޔާއާއި 10 ރުފިޔާއާއި 20 ރުފިޔާއާއި 50 ރުފިޔާއާއި 100 ރުފިޔާއާއި އަދި 500 ރުފިޔާގެ ނޫޓުތަކަށެވެ.
އަދި ރައީސުލް ޖުމްހޫރިއްޔާގެ ގަރާރަކުން ޖެނުއަރީ އެކެއް 2018 އިން ފެށިގެން ލީގަލްޓެންޑަރ ނޫން ކަމުގައި ކަނޑައަޅުއްވާފައިވާ 5 ރުފިޔާގެ ކަރުދާސް ނޫޓު ތަކަށްކަމަށް އެމްއެމްއޭއިން ހާމަކުރެއެވެ.
