"ވާދޫ ގްރީން ފާމް" އިފްތިތާޙް ކޮށްފިއެވެ. ފާމް އިފްތިތާހްކޮށްދެއްވީ ދަނޑުވެރިކަމާއި ދިރޭތަކެއްޗާ ބެހޭ ވަޒީރު، ޑރ. މަރިޔަމް މަރިޔާ،އެވެ.
މި މަޝްރޫޢަކީ ޔޫ.އެން.ޑީ.ޕީ އާއި، މިވުޒާރާއާއި، އަދި ވާދޫ އެސޯސިއޭޝަން ފޮރ ފިއުޗަރ ޑިވެލޮޕްމެންޓް (ވީ.އޭ.އެފް.ޑީ) ގުޅިގެން ކުރިއަށްގެންދާ މަސައްކަތެކެވެ. މިއީ ދިވެހިރާއްޖޭގައި ރަށްފުށުގެ މުޖުތަމަޢުތައް އިސްކޮށްގެން ކުރިއަށްގެންދާ މޫސުމަށް އެކުވެރި ދަނޑުވެރިކަމާއި، އިއާދަކުރަނިވި ހަކަތައަށް ބަދަލުވުމުގައި ލިބުނު މުހިންމު ކުރިއެރުމެކެވެ.
ވާދޫ ގްރީން ފާމް އިން ތަޢާރަފްކުރަނީ ސީދާ އިއާދަކުރަނިވި ހަކަތައިން ހިންގާ ވިޔަފާރީގެ ބޮޑުމިނުގައި ހައިޑްރޮޕޯނިކްސް ދަނޑުވެރިކަމެވެ. މި މަރުކަޒުގައި ތިމާވެއްޓާ އެކުވެރި އެތައް ޓެކްނޮލޮޖީތަކެއް އެކުލެވިގެންވެއެވެ:
ސޯލާ-ޕަވަރޑް ހައިޑްރޮޕޯނިކްސް: ފެންދިނުމާއި ފިނިކުރުމުގެ ނިޒާމުތައް ހިންގުމަށް ފުރާޅު މަތީގައި ހަރުކޮށްފައިވާ ސޯލާ ޕެނަލްތައް ބޭނުންކުރުން.
ވަޞީލަތްތައް މެނޭޖްކުރުން: ވާރޭފެން ނަގާ ނިޒާމުތަކާއި ތިމާވެއްޓާ އެކުވެރި ގްރޯވިންގ މީޑިއާ އެކުލެވުން.
އުފެއްދުމުގެ ޤާބިލިއްޔަތު: މި ފެސިލިޓީގައި ކޮންމެ ފަހަރަކު600 ކިލޯ ކިއުކަމްބާ އާއި400 ކިލޯ ކާން ބޭނުންކުރާ ފަތުގެ ބާވަތްތައް އުފެއްދުމަށް ވަނީ ފަރުމާކުރެވިފައެވެ.
މި މަޝްރޫޢުގެ އެންމެ މުހިންމު އެއް މަޤްޞަދަކީ ޖިންސީ ހަމަހަމަކަމާއި އަދި ރަށު ފެންވަރުގެ އިޤްތިޞާދީ ކުރިއެރުމަށް މަގުފަހިކުރުމެވެ. މި ފާމުން ކޮންމެ މަހަކު ގާތްގަނޑަކަށް 80,000 ރުފިޔާގެ އާމްދަނީއެއް ލިބޭނެކަމަށް ލަފާކުރެވޭއިރު، މިއީ މުޖުތަމަޢަށް ދިރިއުޅުމުގެ ޤާބިލް ވަޞީލަތެއް ހޯދައިދޭނެ ކަމެކެވެ.
ޚާއްޞަ ތަމްރީން: 18 އަންހެނުންނަށް ވަނީ ހައިޑްރޮޕޯނިކްސް ދަނޑުވެރިކަމުގެ އެޑްވާންސްޑް ތަމްރީން ދެވިފައެވެ.
ޓެކްނިކަލް ހުނަރު އިތުރުކުރުން: އިތުރު 25 އަންހެނުންނަށް ވަނީ ސޯލާ ހަކަތައިގެ ނިޒާމުތައް ހަރުކުރުމާއި ބެލެހެއްޓުމުގެ ޤާބިލްކަން އިތުރުކުރުމުގެ ތަމްރީން ދެވިފައެވެ.
މި ގްރީން ފާމަކީ ވާދޫގެ ބޮޑު ކާމިޔާބީގެ ހިއްސާއެކެވެ. ޖީ.އީ.އެފް އެސް.ޖީ.ޕީގެ އެހީގައި ކުރިއަށްގެންދިޔަ އެކި މަޝްރޫޢުތަކުގެ ތެރެއިން، ވީ.އޭ.އެފް.ޑީ އިން ވަނީ އެރަށުގެ ހަކަތަ ބޭނުންކުރާ ގޮތް ބަދަލުކޮށްފައެވެ:
އިއާދަކުރަނިވި ހަކަތަ ޤާބިލިއްޔަތު: މިހާރު އެރަށުގައި ޖުމްލަ 32.5 ކިލޯވޮޓްގެ ސޯލާ ހަކަތަ ވަނީ ޤާއިމްކުރެވިފައެވެ.
ތިމާވެއްޓަށް ކުރާ ނޭދެވޭ އަސަރު ކުޑަކުރުން: ޑީސަލް ބޭނުންކުރުން ވަނީ 32 އިންސައްތަ އަށް މަދުކުރެވި، ކޮންމެ އަހަރަކު 20 ޓަނަށްވުރެ ގިނަ ކާބަން ޑައިއޮކްސައިޑް ބޭރުވުން ކުޑަކުރެވިފައެވެ.
މި ނިޒާމުތައް އަމިއްލައަށް ހިންގާ އަދި ބެލެހެއްޓުމަށް 40 ށް ވުރެ ގިނަ މީހުނަށް ވަނީ ތަމްރީން ދެވިފައެވެ.
ވާދޫ ގްރީން ފާމް އަކީ ސީދާ ދެމެހެއްޓެނިވި ތަރައްޤީގެ ލަނޑުދަނޑިތައް، ސަސްޓައިނަބަލް ޑިވެލޮޕްމަންޓް ގޯލްސް (އެސް.ޑީ.ޖީސް)ހާސިލްކުރުމަށް އެހީތެރިވެދޭ މަޝްރޫޢެކެވެ. ޚާއްޞަކޮށް، ބަޔޯޑައިވަރސިޓީ ރައްކާތެރިކުރުމާއި، މޫސުމަށް ބަދަލުވުމާ ދެކޮޅަށް މަސައްކަތްކުރުމާއި، އަދި ހުރިހާ ފަރާތްތަކަށް ހަމަހަމަ އިޤްތިޞާދީ ކުރިއެރުމެއް ހޯދުމަށް އަމާޒުކުރެއެވެ. މިއީ ބައިނަލްއަޤްވާމީ މޫސުމީ ގޮންޖެހުންތަކާ ކުރިމަތިލާ ކުދި ރަށްފުށުގެ މުޖުތަމަޢުތަކަށް ބޮޑެތި ބަދަލުތައް ގެނެސްދެވިދާނެ ގޮތުގެ ޤައުމީ މިސާލެކެވެ.
