100 ހައުސިންގް ޔުނިޓުގެ އިތުރުން 30 އެނދުގެ ހޮސްޕިޓަލެއް އެޅުމުގެ މަޝްރޫއު ހަނިމާދޫގައި ފަށަން މި ސަރުކާރުން މަސައްކަތް ކުރަމުން އަންނަ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ހދ ގެ ތިން ރަށަކަށް ކުރައްވަމުން ގެންދަވާ ރަސްމީ ދަތުރު ފުޅުގައި ރައީސް ސޯލިހު މިއަދު ވަނީ ހަނިމާދޫއަށް ވަޑައިގެންފަ އެވެ. އެރަށުގެ ކައުންސިލް މެމްބަރުންނާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެމްބަރުންނާއި ރައީސް މިއަދު ބައްދަލު ކުރެއްވި އެވެ.
ރައީސް އާއި ހަވާލާ ދެއްވައި ރައީސް އޮފީހުން ބުނީ ހަނިމާދޫގެ ހައުސިންގެ މައްސަލަތަކަށް ޙައްލު ހޯދުމުގެ ގޮތުން އަންނަ އަހަރުގެ ބަޖެޓުގައި 100 ހައުސިންގ ޔުނިޓްގެ މަސައްކަތް ހިމެނޭކަމަށެވެ. އަދި ޞިއްޙީ ދާއިރާއިން 30 އެނދުގެ ހޮސްޕިޓަލެއް އެޅުމުގެ މަސައްކަތް މިއަހަރަރުގެ ތެރޭގައި ޓެންޑަރ ކުރުމަށް މަސައްކަތް ކުރައްވާނެކަމަށާއި އަދި މި ނޫންވެސް ހަނިމާދޫގައި ސަރުކާރުން ކުރިޔަށްގެންދިއުމަށް ހަމަޖެހިފައިވާ މުހިންމު ބައެއް ޕްރޮޖެކްޓްތަކުގެ މައުލޫމާތު ހިއްސާ ކުރެއްވި ކަމަށެވެ.
President @ibusolih holds discussions with Hanimaadhoo Island Council and Women’s Development Committee pic.twitter.com/brdgvc6LO2
— The President's Office (@presidencymv) July 18, 2021
މީގެ އިތުރުން ހަނިމާދޫގައި ތަރައްޤީކުރާ އިންޓަރނޭޝަނަލް އެއަރޕޯޓަކީ ޚާއްޞަކޮށް މުޅި ބޮޑު ތިލަދުންމަތީގެ ތަރައްޤީއަށާއި، ފަތުރުވެރިކަމުގެ ތަރައްޤީއަށް ވަރަށް މުހިންމު މަޝްރޫޢެއްކަން ރައީސް ފާހަގަކުރެއްވި އެވެ. އެ ޕްރޮޖެކްޓް ކާމިޔާބުކަމާއެކު ކުރިޔަށްގެންދިއުމުގައި ކައުންސިލާއި އަދި ރައްޔިތުންގެ އެއްބާރުލުން ލިބިގެންދިއުމަކީ ވަރަށް މުހިންމުކަމެއް ކަމަށް ރައީސް ވިދާޅުވި އެވެ.
މިއަދުގެ ބައްދަލުކުރެއްވުމުގައި ހަނިމާދޫ ކައުންސިލް މެމްބަރުން ވަނީ އެއާޕޯޓުގެ މަޝްރޫއު އަވަސްކުރަން ބޭނުންވާކަމަށް ވިދާޅުވެފަ އެވެ. އަދި އެއަރޕޯޓާ ގުޅިގެން އެކި ގޮތްގޮތުން ރަށަށް ލިބޭނެ ކުރިއެރުންތައް ކައުންސިލުން ފާހަގަކުރެއްވި އެވެ. މިހާރު ކުރިއަށް ގެންގޮސްފައިވާ ތަރައްގީގެ މަޝްރޫއުތަކުގެ ސަބަބުން ރަށަށް ކުރިއެރުންތަކެއް ލިބިފައިވާކަމަށްވެސް ކައުންސިލަރުން ވިދާޅުވި އެވެ.
އަންހެނުންގެ ކޮމިޓީން ވަނީ އަންހެނުންގެ ހާއްސަ ޑޮކްޓަރަކާއި ސްކޭން ކުރުމުގެ ހިދުމަތް ބޭނުންވާކަމަށް ވިދާޅުވެފަ އެވެ. އަދި ކުޅިވަރުގެ ދާއިރާއިން އަންހެނުންގެ ވޮލީ ކޯޓެއްވެސް ބޭނުންވެފައިވާކަމަށް އަންހެނުންގެ ކޮމިޓީ މެމްބަރުން ރައީސް އަރިހުގައި ދެންނެވި އެވެ.
