ސަރުކާރު ހިންގާ މައި ޕާޓީ، އެމްޑީޕީގައި މިހާރު އުފެދިގެން އުޅޭ ދެބަސްވުމުގައި އެމްޑީޕީގެ އަންހެނުންގެ ރޫހުންވެސް ތާއީދު ކުރަނީ އެޕާޓީގެ ރައީސް މުހައްމަދު ނަޝީދުގެ ފިކުރަށް ކަމަށާއި ސަރުކާރުން އެޕާޓީގެ އަސާސްތައް ދެމެހެއްޓުމަށް ގޮވާލައިފި އެވެ.
ހިޔާލު ތަފާތުވުން އުފެދިގެން އުޅެނީ ރައީސް ނަޝީދާއި ރައީސް އިބްރާހިމް މުހައްމަދު ސޯލިހާއި ދެމެދު އެވެ. ނަޝީދު ވިދާޅުވާ ގޮތުގައި އެމްޑީޕީގެ އަސާސްތަކާއި ހިލާފަށް ޑިމޮކްރަސީގެ ފޭރާން ގެއްލޭ ގޮތަށް ސަރުކާރުން ކަން ކުރަމުން ދަނީ ކޯލިޝަންގައި ހިމެނޭ ބައެއް ޕާޓީތައް ރުއްސުމަށެވެ. ނަޝީދުގެ ފިކުރަށް ތާއީދުކޮށް އެމްޑީޕީ ޒުވާނުންގެ ހިތްވަރުންވެސް މީގެ ކުރިން ވަނީ ބަޔާނެއް ނެރެފަ އެވެ.
އަންހެނުންގެ ރޫހުން އިއްޔެ ނެރުނު ބަޔާނެއްގައި ބުނީ އެމްޑީޕީ އުފެދުނީއްސުރެއް އެޕާޓީން އަބަދުވެސް ވަކާލާތުކުރާ އެންމެ މުހިންމު އަސާސްތަކަކީ، އެއްވެ އުޅުމުގެ މިނިވަންކަމާއި، ހިޔާލުފާޅު ކުރުމުގެ މިނިވަންކަމާއި، ހަމަހަމަކަން ޤާއިމުކޮށް، ދިރިހުރުމުގެ ޙައްޤު ކަށަވަރުކޮށް އަނިޔާވެރިކަން ނައްތާލުމަށް ކަމަށެވެ. 2018 ގައިވެސް އަދި 2019 ގައިވެސް އެޕާޓީން ވި އެންމެ މުހިންމު ވައުދަކީ ގޮތް ނޭނގި ގެއްލުވާލާފައިވާ މީހުނާއި މަރާލެވިފައިވާ މީހުންނަށް އިންސާފު ހޯދައިދީ، އެފަދަ އަނިޔާވެރި އަމަލުތައް ރާއްޖޭގައި ތަކުރާރުވިޔަ ނުދިނުމަށް ފިޔަވަޅު އަޅާނެކަމުގެ ވައުދު ކަމަށާއި މިހުރިހާ ހާދިސާތަކަކާއި އަދި ރައީސް ނަޝީދަށް ދިން ހަމަލާއާއިވެސް ގުޅެނީ ބަޔަކު މީހުން ވަކި ގޮތަކަށް "ލޭބަލް" ކުރުން ކަމަށް ބުންޏެވެ.
"... އެމް.ޑީ.ޕީ.ގެ ވައުދުތަކާއި އެއްގޮތަށް އެފަދަ އަނިޔާވެރި އަމަލުތައް ހުއްޓުވޭނީ ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި ޤާނޫނުލްއުޤޫބާތަށް އިސްލާޙު ގެނައުމުގެ ބިލު ފާސްކޮށް، ވަކިވަކި ފަރުދުންނާއިމެދު ނަފްރަތު އުފެއްދުމަކީ ޤާނޫނީ ކުށަކަށް ހަދައިގެންކަން މިޕާޓީގެ އަންހެނުންގެ ރޫހުން ޤަބޫލުކުރަމެވެ."
- އަންހެނުންގެ ރޫހުން ނެރުނު ބަޔާން
ދިވެހި ރައްޔިތުންގެ ޑިމޮކްރެޓިކް ޕާޓީއަކީ މެދުމިނުގެ ދީނީ ފިކުރުގެ ދައުލަތެއް ދިވެހިރާއްޖޭގައި ބޭއްވުމަށް މަސައްކަތްކުރާ ޕާޓީއެއް ކަމަށާއި އެ ޕާޓީއަކީ އިސްލާމް ދީނުގެ އަސްލުތަކާއި ޚިލާފަށް ކުރާ އެއްވެސް ކަމަކަށް ތާއީދު ކުރާނެ ޕާޓީއެއްނޫންކަން އެ ބަޔާނުގައި ވަނީ ފާހަގަކޮށްފަ އެވެ. ރައްޔިތުންގެ ހިތްތަކުގައި ބިރިވުރިކަން އުފައްދައި، ޤައުމު ނުރައްކަލަށް ވައްޓާލުމަށް ޖާގަ ދެވިގެން ނުވާނެ ކަމަށާއި ހައްދުފަހަނައަޅާފައިވާ ހަރުކަށި ފަރާތްތަކުން ގޮވާލާ އެފަދަ ގޮވާލުންތަކުގެ ފައިދާ ސިޔާސީ ބައެއް ފަރާތްތަކުން ނަގައި، ދަނޑިވަޅުގެ ބޭނުންކޮށް ޤައުމު ހަލަބޮލިކޮށް ރައްޔިތުންގެ މެދުގައި ނަފްރަތު އުފައްދަން މަސައްކަތް ކުރާ ކަމީ ކަންބޮޑުވާ ކަމެއްކަމަށް އެމްޑީޕީ އަންހެނުންގެ ރޫހުން ވަނީ ބުނެފަ އެވެ.
އިތުރަށް އެ ބަޔާނުގައި ބުނީ ސަރުކާރުގެ އިއްތިހާތުގައި ހިމެނޭ މައިނޯރިޓީ ޕާޓީއަކުން ނުރުހުން ފާޅުކުރި ހިސާބުން، ސަރުކާރުން ފޮނުވި ބިލު ސަރުކާރުން ދިފާއު ނުކޮށް، މުޖުތަމައުގައި ނަފްރަތު އުފެއްދުން ހުއްޓުވާ އަނިޔާވެރި އަމަލުތަކާއި ދެކޮޅަށް ފިޔަވަޅު އަޅާނެކަމަށް އެމްޑީޕީއިން ވެފައިވާ ވައުދު ސަރުކާރުން ހަނދާން ނައްތާލުމަކީ އެމްޑީޕީގެ އަސާސްތަކާއި ހިލާފަށް ނިންމި ނިންމުމެއް ކަމަށެވެ. އަދި ރާއްޖެއަކީ އަމާން ވެއްޓެއް ޤާއިމުވެފައިވާ ތަނަކަށް ހެދުމަށްޓަކައި، ވަގުތީ ސިޔާސީ މަންފާއަށްވުރެ ރައްޔިތުންގެ އަސަސީ ޙައްޤުތައް ހިމާޔަތްކުރުން އިސްކޮށް، އެމްޑީޕީން ރައްޔިތުންނަށް ވެފައިވާ ވައުދުތައް ފުއްދުން ހަލުވިކުރުމަށާއި، އެ.މް.ޑީ.ޕީ. ގެ އަސާސްތަކަށް ސަރުކާރުން އިޙްތިރާމްކޮށް އެ.މް.ޑީ.ޕީ. ގެ މައިގަނޑު އަސާސްތައް ދިފާޢު ކޮށްދެއްވުމަށް އަންހެނުންގެ ރޫހުން ވަނީ އިލްތިމާސްކޮށްފަ އެވެ.
