ޓެރަރިޒަމް އާއި އެކްސްޓްރީމިޒަމް ފަތުރާ މީހުން ތިބީ ސަރުކާރުގައި ކަމަށް މަޑުއްވަރީ ދާއިރާގެ މެމްބަރު އާދަމް ޝަރީފު އުމަރު ވިދާޅުވެއްޖެއެވެ.
ރާއްޖެއިން ހަރުކަށި ފިކުރާ ދެކޮޅަށް ކުރާ މަސައްކަތްތަކުގެ މައްޗަށް އަލި އަޅުއްވާލާ ނަޝީދު ދެއްކެވި ވާހަކަފުޅަށް އިޝާރާތް ކުރައްވާ މެމްބަރު އާދަމް ޝަރީފް ވިދާޅުވީ، ކަންކަން އިސްލާހު ކުރާނަމަ ފުރަތަމަ ސާފު ކުރަންވީ ސަރުކާރުގެ އެެތެރެ ކަމަށެވެ.
ޓެރަރިޒަމް އަދި އެކްސްޓްރީމިޒަމް ގެ ނުރައްކާ ރާއްޖެއަށް ބޮޑުވަމުން ދަނީ ސަރުކާރުގެ ސިޔާސަތުތަކުގެ ސަބަބުން ކަމަށާއި ޒިންމާ ނަގަން ޖެހޭނީ އެމްޑީޕީ ލީދު ކުރާ ސަރުކާރުން ކަމަށް މެމްބަރު އާދަމް ޝަރީފްގެ ޓުވީޓްގައި ވަނީ ފާހަގަ ކުރައްވާފައެވެ.
އިންޑިއާގެ "ވިއޯން ނިއުސް" އަށް ދިން ވީޑިއޯ އިންޓަވިއުއެއްގަ ނަޝީދު ވަނީ ފުރާނަކޮޅު ދުއްވައިލަން ދިން ޓެރަރިސްޓު ހަމަލާގެ ތުހުމަތު ކުރެވެނީ ދީނީ ހަރުކަށި ފިކުރުގެ މީހުންނަށްކަން ފާހަގަކުރައްވާފައެވެ.
ނަޝީދު ވިދާޅުވީ އެންމެ ފުރަތަމަ ކަމަކަށް ސިޔާސީ ހުރިހާ ފިކުރެއްގެ ހުރިހާ ޕާޓީއެއްގެ މީހުން އެކަތިގަނޑަކަށްވެ މި މައްސަލައާއި ދެކޮޅަށް މަސައްކަތް ކުރަންޖެހޭ ކަމަށާއި އެއަށްފަހު ބައެއް މުއައްސަސާތަކުގެ ތެރޭގައި ފެތުރިފައި އޮތް ހަރުކަށި ފިކުރު ނައްތައިލަން ޖެހޭކަމަށެވެ.
