ނަމާދުގެ ހުކުމްތައް ދަންނަ ޝަރުއީ ގޮތުން ބާލިޣުވެފައިވާ 13 އަހަރާއި 15 އަހަރުގެ ކުދިން އިމާމުވެ ނަމާދު ކުރުމަކީ ދީނީ ގޮތުން މައްސަލައެއް އޮތް ކަމެއް ނޫން ކަމަށް ކުރީގެ އިސްލާމިކް މިނިސްޓަރ ޑރ މުހައްމަދު ސަހީމް އަލީ ސައީދު ވިދާޅުވެއްޖެއެވެ.
ޑރ ޝަހީމް ކުރެއްވި ޓުވީޓެއްގައި ވިދާޅުވީ، ހާއްސަގޮތެއްގައި ކީރިތި ގުރުއާން ކިޔަވާ ހިތުދަސް ކުދިންނަށް އެފަދަ ފުރުސަތެއް އޮތުމަކީ ރަނގަޅުކަމެއް ކަމުގައި ދެކެވަޑައިގަންނަވާ ކަމަށެވެ. އަދި ނަމާދުގެ މިސްކިތުގައި ކުރީ ސަފުގައި ކުޑަ ކުއްޖަކު އިނަސް އެކުދިން ފަހަތު ސަފަށް ޖައްސާ ބޭރުކޮށްލުމަކީ ކޮށްގެން ވާނެ ކަމެއް ނޫން ކަމަށް ޑރ ޝަހީމް ވިދާޅުވިއެވެ. މީގެ އިތުރުން ކުރީ ސަފުގެ ޖާގަ ތަކަކީ އެތަނުގައި ކުރިން އިންނަ މީހެއްގެ ހައްގެއް ކަމަށާއި ކުޑަ ކުއްޖަކު ގޮސް ކުރިން އިށީދެއްޖެ ނަމަ އެކުއްޖަކު ބޭރު ނުކުރެވޭނެ ކަމަށެވެ. އަދި ހާއްސަކޮށް އެއީ އުމުރުން ހަތް އަހަރު ފުރިފައިވާ ކުއްޖެއްނަމަ އެކަން ކޮށްގެން ނުވާނެ ކަމަށް ޑރ ޝަހީމް ވިދާޅުވިއެވެ.
ކުޑަކުދިން މިސްކިތަށް ލޯބި ޖެއްސުމާއި މިސްކިތުން އެކުދިން ބަލައިގަންނަކަން އެކުދިންނަށް އިހުސާސް ވާން ޖެހޭނެ ކަމަށާއި ސުންނަތަކީ ކުޑަކުދިންނަށް މިސްކިތުން ލޯތްބާއި އިހުތިރާމް ދިނުން އެކުދިންނަކީ ޖަމާއަތުގެ ބައިވެރިންކަމުގެ އިހުސާސް ވުމަކީ މުހިއްމު ކަމެއް ކަމަށް ޑރ ޝަހީމްގެ ޓުވީޓްގައި ވިދާޅުވެފައިވެއެވެ.
ޑރ ޝަހީމް މިގޮތަށް ވިދާޅުވެފައިވަނީ މިސްކިތްތަކުގައި ކުޑަކުދިން ލައްވާ އިމާމުވެ ޖަމާއަތުގައި ނަމާދު ނުކުރުމަށް އިސްލާމިކް މިނިސްޓްރީން އެންގުމާއި ގުޅިގެންނެވެ.
